काठमाडौं । वाटा (डब्लुएटिए) अन्तर्राष्ट्रिय तेक्वान्दो च्याम्पियनसिपको २१औँ संस्करणमा सहभागी हुन पाँच खेलाडीसहित सात सदस्यीय नेपाली टोली आज (बिहीबार) जापानको ओसाका प्रस्थान गर्ने भएको छ । अप्रिल २५ देखि २७ तारिखसम्म हुने प्रतियोगितामा खेलाडीले ग्योरोगी र पुम्से स्पर्धामा प्रतिस्पर्धा गर्नेछन् । ३० केजीमुनि हृदयणी बस्नेत, ३४ केजीमुनि जोलिना बस्नेत, २४ केजीमुनि सोहन पाठक, यू-१२ एकल पुम्सेमा सक्षम श्रेष्ठ र यू-१४ एकल पुम्सेमा आश्रय उपाध्यायले प्रतिस्पर्धा गर्नुहुनेछ ।

प्रशिक्षकमा सरोज तामाङ रहनुभएको छ । १३औँ दक्षिण एसियाली खेलकुद (साग) की स्वर्ण विजेता काजल श्रेष्ठले प्रतियोगितामा निर्णायकको भूमिका निर्वाह गर्नुहुनेछ । काजलले यसै प्रतियोगिताको २०औँ संस्करणमा पनि निर्णायकको भूमिका निर्वाह गर्नुभएको थियो ।
टोलीलाई राष्ट्रिय खेलकुद परिषद् (राखेप) कार्यकारी समितिका सदस्य भानबहादुर चन्द, राखेपकी सदस्य नन्दा बस्याललगायतले एक कार्यक्रमबीच बिदाइ गर्नुभयो ।