काठमाडौं । नेपालगञ्जमा जारी लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको उपाधिका लागि सशस्त्र प्रहरीको एपिएफ क्लब र नेपाल पुलिस क्लब आज (शुक्रबार) भिड्दै छन् । नेपालगञ्ज रंगशालामा बुधबार भएको दोस्रो सेमिफाइनलमा एपिएफले रौतहटलाई तीन-शून्य गोल अन्तरले पराजित गर्दै एपिएफ क्लबले पुलिस क्लबसँगको भेट पक्का गरेको थियो ।

पुलिस क्लबले मंगलबार विभागीय डर्बीमा त्रिभुवन आर्मी क्लबलाई सडन डेथमा पराजित गर्दै फाइनलमा स्थान बनाएको थियो । प्रतियोगिताको फाइनल खेल आज (शुक्रबार) दिउँसो ३ बजे हुनेछ ।

प्रतियोगितामा घरेलु टोली बाँके-११, एपिएफ, नेपाल पुलिस क्लब, त्रिभुवन आर्मी क्लब, कर्णाली एफसी, सुदूरपश्चिम एफसी, सिलिगुडी फुटबल क्लब र रौतहट जिल्ला फुटबल संघ टोली सहभागी थिए । प्रतियोगिताको उपाधि विजेताले पाँच लाख पाँच हजार ५५५ तथा उपविजेताले दुई लाख ५० हजार रुपैयाँ प्राप्त गर्ने आयोजकले जनाएको छ ।