काठमाडौं । करिब ४९ लाखको लागतमा पहाडी जिल्ला भोजपुरमा आज (आइतबार)बाट आठौं अन्तर्राष्ट्रिय आमन्त्रित मेयर गोल्डकप प्रतियोगिता सुरु हुँदैछ । प्रत्येक वर्ष सञ्चालन हुने जिल्लाको प्रतिष्ठित गोल्डकप प्रतियोगिताको तयारी अन्तिम चरणमा पुगेको शनिबार रंगशालामा आयोजित पत्रकार सम्मेलनमा आयोजक भोजपुर जिल्ला फुटबल संघका अध्यक्ष प्रवीण सुवालले जानकारी दिनुभयो ।

प्रतियोगिताअन्तर्गतको पहिलो खेल जर्जियन फुटबल क्लब, भारत र आयोजक भोजपुर जिल्ला फुटबल संघका बीचमा हुनेछ । वैशाख १४ गतेदेखि २० गतेसम्म सञ्चालन हुने प्रतियोगितामा बाहिरी जर्जियन फुटबल क्लब, भारत, आयोजक भोजपुर जिल्ला फुटबल संघ, सलहेश फुटबल क्लब सिरहा, सशस्त्र प्रहरी बल नेपाल, भगवती स्पोर्ट्स क्लब खोटाङ, नबोबुद्ध फुटबल क्लब सप्तरी, चर्च ब्वाइज युनाइटेड काठमाडौं र एलएक्स सिटी मोरङ गरी आठ टिमले सहभागिता जनाउनेछन् । जिल्ला फुटबल संघको आयोजना तथा भोजपुर नगरपालिकाको मुख्य प्रायोजनमा प्रत्येक वर्ष जिल्ला सदरमुकाममा सञ्चालन हुँदै आएको प्रतियोगिता भोजपुर नगरपालिका वडा नम्बर ७, कोदारमा रहेको रंगशालामा सञ्चालन हुनेछ ।

प्रतियोगिताका विजेता तथा उपविजेताले उपाधिसहित क्रमशः नगद पाँच लाख र तीन लाख पाउनेछन् । अन्य व्यक्तिगत विधातर्फ पनि सर्वोत्कृष्ट खेलाडी, सर्वाधिक गोलकर्ता, उत्कृष्ट गोल रक्षकलाई पुरस्कारको व्यवस्था गरिएकोे आयोजक भोजपुर जिल्ला फुटबल संघका अध्यक्ष सुवालले जानकारी दिनुभयो ।

गत वर्ष सञ्चालन भएको सातौं संस्करणमा चर्च ब्वाइज युनाइटेड, काठमाडौंले त्रिभुवन आर्मी क्लबलाई पेनाल्टी सुटमा ४-२ गोलले पराजित गर्दै विजेता बनेको थियो ।