काठमाडौ । पोखरा स्पोर्ट्स अवार्ड-२०८१ को नोमिनेसन सार्वजनिक गरिएको छ । नेपाल खेलकुद पत्रकार मञ्च गण्डकी प्रदेशले वैशाख २६ गते पोखरा इभेन्ट सेन्टर बुलौंदी लेकसाइडमा आयोजना गर्ने पोखरा स्पोट्र्स अवार्ड-२०८१ का लागि चार विधाका नोमिनेसन सार्वजनिक गरेको हो । मञ्चले पोखरामा पत्रकार सम्मेलन गरी वर्ष सर्वोत्कृष्ट खेलाडी पुरुष र महिला, उदीयमान वर्ष खेलाडी र वर्ष उत्कृष्ट प्रशिक्षक विधाका नोमिनेसनमा पर्न सफल तीन/तीनजना खेलाडीको नाम सार्वजनिक गरेको हो । वर्ष सर्वोत्कृष्ट पुरुष विधामा भलिबलका विश्वास अधिकारी (नवलपुर), टेनिसका प्रदीप खड्का (कास्की) र फुटबलका सुमित श्रेष्ठ (कास्की) नोमिनेसनमा पर्नुभएको छ ।
त्यस्तै, वर्ष सर्वोत्कृष्ट महिला खेलाडी विधामा फेन्सिङकी कृपा गुरुङ (स्याङ्जा), भलिबलकी अरूणा शाही (कास्की) र आइटिएफ तेक्वान्दो/मुवाथाईकी सुस्मिता थापामगर (बागलुङ) पर्नुभएको छ । वर्ष उदीयमान खेलाडीमा एथलेटिक्सका बादल कार्की (बागलुङ), भलिबलका जितबहादुर सार्की (स्याङ्जा) र क्रिकेटकी रचना चौधरी (कास्की) नोमिनेसनमा परेको मञ्चका अध्यक्ष मानबहादुर घर्तीले जानकारी दिनुभयो । यसैगरी वर्ष उत्कृष्ट प्रशिक्षक विधामा टेनिसका निरज थापा (कास्की), भलिबलका रमेश केसी (स्याङ्जा) र फुटबलका राजेन्द्र तामाङ (कास्की) नोमिनेसनमा पर्नुभएको छ ।
मञ्चले वार्षिक रूपमा आयोजना गर्ने पोखरा स्पोट्र्स अवार्डमा सात विधामा अवार्ड वितरण गर्दै आएको छ । बाँकी तीन विधा लाइफटाइम अचिभमेन्ट अवार्ड, वर्ष उत्कृष्ट खेल पत्रकार अवार्ड र वर्ष उत्कृष्ट खेल संघ अवार्डको छनोट केही दिनपछि गरिने मञ्चका महासचिव परशुराम शर्माले बताउनुभयो ।
मञ्चले वैशाख २६ गते पोखरा इभेन्ट सेन्टर बुलौंदी लेकसाइडमा पोखरा स्पोट्र्स अवार्डको नवौं संस्करण आयोजना गर्दैछ । मञ्चले सर्वोत्कृष्ट महिला र पुरुष विधामा अवार्ड प्राप्त गर्नेलाई अवार्डसँगै एक-एक थान टेलजी इलेक्ट्रिक स्कुटर प्रदान गर्ने जनाएको छ । त्यसबाहेक अन्य सबै विधामा अवार्ड प्राप्त गर्नेलाई अवार्डसँगै जनही ३५/३५ हजार प्रदान गर्ने मञ्चका उपाध्यक्ष राजाराम पौडेलले जानकारी दिनुभयो ।
गण्डकी प्रदेश सरकार र पोखरा महानगरपालिकासँगको सहकार्य तथा राष्ट्रिय खेलकुद परिषद (राखेप), गण्डकी खेलकुद परिषद् (गखेप), पोखरा महानगर खेलकुद परिषद्को सहयोगमा यो अवार्ड हुन लागेको जनाइएको छ ।
