काठमाडौं । ग्लोबल आइएमई बैंकले नेपाल क्लियरिङ हाउससँगको सहकार्यमा कार्डमा आधारित अनलाइन ग्लोबल पेमेन्ट गेटवे सुचारु गरेको छ । उक्त गेटवे सुचारुसँगै बैंकका मर्चेन्टहरूले जुनसुकै राष्ट्रिय तथा अन्तर्राष्ट्रिय बैंकहरूबाट जारी भएको भिसा तथा मास्टर कार्डमार्फत् भुक्तानी प्राप्त गर्न सक्नेछन् । ग्लोबल आइएमई बैंकले नेपालमा ई-कमर्स कारोबार प्रवद्र्धन गर्ने उद्देश्यले ग्लोबल पेमेन्ट गेटवे सञ्चालनमा ल्याएको हो ।

ग्लोबल पेमेन्ट गेटवेले बैंकका मर्चेन्टहरूलाई आफ्नो व्यवसायको दायरा विस्तार गरी देशविदेशबाट सहज रूपमा भुक्तानी लिन सक्नेछन् । गेटवे सुरुवातपछि ई-कमर्स कारोबार गर्ने जस्तै ट्राभल तथा टुर एजेन्सी, होटल, एयरलाइन्स, हस्पिटललगायतका व्यवसाय लाभान्वित हुनेछन् । बैंकका अनुसार ग्लोबल पेमेन्ट गेटवेले राष्ट्रिय र अन्तर्राष्ट्रिय भुक्तानीहरू प्राप्तिका लागि सहज बनाउने भएकाले बैंकका मर्चेन्टहरूको व्यवसायलाई वृद्धिमा सहयोग पुग्नुका साथै पेमेन्ट गेटवेमा थ्रिडी सेक्योर्ड प्रविधि प्रयोग हुने भएकाले गेटवेमार्फत् हुने कारोबार थप सुरक्षित हुनेछ ।