काठमाडौं । गुल्मीको रेसुङ्गा बिमानस्थलबाट पुन : सातामा तीन दिन उडान हुने भएको छ । रेसुङ्गा विमानस्थलका प्रमुख सुमन थापाका अनुसार आइतबार, मंगलबार र बिहिबार उडान हुनेछ।
नेपाल एयरलाइन्सको हरेक उडानमा यात्रुको चाप भएपनि जहाज अभाव र मौसम लगायतको कारण सेवा नियमित हुन सकेको छैन । जसका कारण एयरलाइन्सप्रति नागरिक विश्वसस्त छैनन् । यद्यपी उडान थप भएपछि स्थानीयमा खुसीयाली छाएको छ ।
जहाज मर्मतका कारण साढे तीन महिना रेसुङ्गा विमानस्थलको हवाई उडान अवरुद्ध भएको थियो । त्यसपछि चैतबाट सुरु भएको उडानमा अहिलेसम्म चार उडान भएको विमानस्थल प्रमुख थापाले बताउनुभयो । रेसुङ्गा विमानस्थलमा नेपाल एयरलाइन्स उडान गर्दै आएको छ । रेसुङ्गा नगरपालिका–८ का वल बहादुर घर्तिले धेरै पटक धोका पाएकाले तीन दिन उडान हुनेमा आफु ढुक्क नभएको बताउनुभयो । उहाँले भन्नुभयो, “पहिलो कुरा आम नागरिकले टिकट पाइँदैन । अर्को कुरा दैनिक उडान भनेपनि ढुक्क नभएपछि विश्वास गर्न सक्ने अवस्था छैन ।’
बिहान ६:१५ मा काठमाडांैबाट र ७:१५ मा रेसुङ्गा विमानस्थलबाट उडान हुने विमानस्थल प्रमुख थापाले बताउनुभयो । गुल्मीको सिमिचौरमा निर्माण भएको रेसुङ्गा विमानस्थलमा ०७५ साल जेठ २५ गते तारा एयरको जहाजले कच्ची धावनमार्गमा सफलतापूर्वक धुले उडान गरेको थियो ।
तारा एयरकै जहाजले ०७९ पुस २४ गते ‘प्रुभिङ फ्लाइट’ गरेको हो । ०८० वैशाख १५ गतेबाट नेपाल एयरलायन्सको जहाजले परिक्षण उडान गर्यो । काठमाडौं–सिमीचौर करिव ५० मिनेटको उडानमा हुने गरेको छ । काठमाडौंबाट रेसुङ्गा सात हजार ५०० रुपियाँ र रेसुङ्गा विमानस्थलबाट काठमाडांै सात हजार ३०० रुपियाँ हवाई भाडा रहेको एयरलाइन्सले जनाएको छ ।(गोरखापत्रबाट)
