काठमाडौं । पश्चिम नवलपरासीको बर्दघाट नगरपालिकाले सेवा अवधि पूरा गरेपछि महिला स्वास्थ्य स्वयंसेविकालाई दिँदै आएको प्रोत्साहन भत्ता वृद्धि गर्ने निर्णय गरेको छ । हालसम्म दुई लाख रुपैयाँ दिँदै आएकोमा अब आगामी आर्थिक वर्षदेखि रकम बढाएर दुई लाख ५० हजार रुपैयाँ पुर्‍याउने भएको छ ।

नगरपालिकाले हालसम्म दुर्ई लाख रुपैयाँ दिँदै आएकोमा आगामी आर्थिक वर्षदेखि रकम बढाएर दुई लाख ५० हजार रुपैयाँ पुर्याउने भएको छ ।

नगरपालिकालाई पूर्ण खोप एवं संस्थागत प्रसूति सेवायुक्त नगरपालिका घोषणा गर्ने समारोहमा बोल्दै नगरप्रमुख शम्भुलाल श्रेष्ठले उक्त जानकारी गराउनुभएको होे । श्रेष्ठले स्वास्थ्य स्वयंसेविकाले नगरमा निःस्वार्थ सेवामा अहोरात्र खटिएको उल्लेख गर्दै उनीहरूको योगदानको कदर स्वरूप प्रोत्साहन भत्ता वृद्धि गर्ने निर्णय भएको उहाँको भनाइ थियो ।

त्यस्तै, आगामी आर्थिक वर्षदेखि सेवा दिइरहेका ४४ स्वयंसेविकालाई प्रतिव्यक्ति १५ हजार रुपैयाँ बराबरको मोबाइल फोनसमेत वितरण गरिने भएको छ । नगरप्रमुख श्रेष्ठले बजेटमै मोबाइलका लागि आवश्यक रकम विनियोजन गरिने जानकारी दिनुभयो ।

उहाँले भन्नुभयो, ‘स्वास्थ्य क्षेत्रमा पालिकाले गर्ने कार्यहरू सफल बनाउन स्वयंसेविकाको योगदान महत्वपूर्ण छ । नागरिकको घरदैलोमै सेवा पुर्‍याउने कार्यमा उनीहरू बिनापारिश्रमिक सक्रिय छन् । यो घोषणाले उनीहरूलाई थप ऊर्जा र प्रेरणा दिनेछ ।’ कार्यक्रममा सहभागी स्वयंसेविकाहरूले नगरपालिकाको निर्णयले आफूहरूलाई सम्मानित र आगामी दिनमा अझ उत्साहपूर्वक सेवा गर्न प्रोत्साहन गरेको बताए ।