काठमाडौं । देशकै जेठो अस्पताल वीर अस्पतालको सेवा सुधारका लागि स्वास्थ्य तथा जनसंख्यामन्त्री प्रदीप पौडेलले कार्यदल गठन गर्नुभएको छ । वरिष्ठ चिकित्सक डा. मदन उपाध्याय संयोजकत्वको कार्यदललाई अस्पतालको सेवा सुधारमा केन्द्रित भएर उपलब्ध जनशक्ति तथा स्रोत साधनको उचित प्रयोगबारे सुझाव दिन कार्यादेश दिइएको छ । त्यसैगरी नागरिकलाई उपलब्ध गराउने फार्मेसी, रेडियोलोजी, प्याथोलोजी तथा अर्थोपेडिक्सजस्ता सेवा तथा तिनका लागि उपलब्ध उपकरणको अहिलेको अवस्था मूल्यांकन गर्दै सुधार गर्ने उपाय सुझाउन पनि कार्यदललाई भनिएको छ । तीनसदस्यीय कार्यदलमा विज्ञका रूपमा दीपकमोहन भट्टराई तथा डा. सुरेश तिवारी सदस्य रहनुभएको छ ।
कार्यदललाई आर्थिक तथा प्रशासनिक जटिलता तथा समाधानका सुझाव दिन पनि कार्यादेश दिइएको छ । त्यसैगरी वीरलाई डिजिटलाइजेसन गर्न देखिएका कठिनाइबारे सुझाव दिँदै भावी योजनासमेत प्रस्ताव गर्न कार्यदललाई कार्यादेश प्रदान गरिएको छ । मन्त्री पौडेलले वीर अस्पतालमा बिग्रिएर थन्किएका उपकरण मर्मतका लागि महावीर पुन नेतृत्वको राष्ट्रिय आविष्कार केन्द्रलाई जिम्मा दिन सहजीकरण गर्नुभएको थियो । फलस्वरूप अहिले धेरै उपकरण निकै कम खर्चमा मर्मत भएर सेवा दिइरहेका छन् ।
स्वास्थ्यमन्त्री पौडेलका अनुसार मन्त्री पौडेल नेतृत्वमा आएयता वीर अस्पतालमा दुर्ई सिफ्टमा ओपिडी सञ्चालनका अतिरिक्त भएका सेवामा समेत धेरैले सेवा लिन सक्ने वातावरण तयार भएको छ । सिटीस्क्यान, एमआरआई आदिले अधिक क्षमतामा सेवा दिइरहेका छन् । मन्त्रीले पठाएको नौबुँदे सुधार सुझावपछि अनलाइनमार्फत् टिकट लिने प्रबन्ध गरिएको छ । जसलाई अझ प्रभावकारी बनाउन मन्त्री पौडेलले वीरलाई डिजिटलाइजेसनमा लैजान प्रयास गरिरहनुभएको छ । अस्पतालका निर्देशक डा. दिलिप शर्माले कार्यदलले दिएको सुझाव कार्यान्वयनमा लैजान प्रयास गरिने बताउनुभएको छ ।
नेपाल औषधि लिमिटेडका औषधि खरिद प्रक्रिया सुरु
नेपाल औषधि लिमिटेडद्वारा उत्पादित बिक्री नभएको गुनासोसँगै स्वास्थ्य तथा जनसंख्यामन्त्री प्रदीप पौडेलसँग छलफल गरेर समस्या समाधानका लागि पहल भएकै दिन स्वास्थ्य सेवा विभागले प्रक्रिया अघि बढाएको छ । विभागअन्तर्गतको व्यवस्थापन महाशाखाले इपिडिमियोलोजी तथा रोग नियन्त्रण महाशाखाको रोग नियन्त्रण कार्यक्रमका लागि आवश्यक पारासिटामोल तथा जीवनजल खरिदका लागि प्रक्रिया अघि बढाउन पत्राचार गरेको हो ।
महाशाखा प्रमुख डा. पवनजंग रायमाझीले मन्त्रालयमा लिमिटेडसँगको छलफलमा मन्त्री पौडेलको प्रतिबद्धतापछि तत्काल प्रक्रिया अघि बढाएको बताउनुभयो । नियमअनुसार खरिद सम्झौता प्रक्रिया अघि बढ्ने उहाँको भनाइ थियो । मंगलबार मन्त्री पौडेलको उपस्थितिमा वाणिज्य तथा आपूर्ति मन्त्रालय र लिमिटेडका अधिकारीहरूबीच छलफल भएको थियो । मन्त्री पौडेलले आवश्यक औषधि नियमअनुसार मन्त्रालय खरिदका लागि सकारात्मक भएको भन्दै प्रक्रिया अघि बढाउने बताउनुभएको थियो । उहाँले स्वास्थ्य संस्थामा आवश्यक भनेर सरकारले तोकेका औषधिसमेत तीनै तहमा पुग्ने गरी खरिदका लागिसमेत सकारात्मक रहेको बताउनुभएको थियो ।
लिमिटेडको औषधि बिक्रीमा देखिएका समस्या समाधानका लागि मन्त्रालयमा भएको छलफलका क्रममा वाणिज्य तथा आपूर्ति मन्त्रालयका सचिवको नेतृत्वमा स्वास्थ्य मन्त्रालय, अर्थ मन्त्रालय, संघीय मामिला तथा सामान्य प्रशासन मन्त्रालयका प्रतिनिधि तथा लिमिटेडका अधिकारी रहने गरी समस्या समाधान समिति बनाउने समझदारी भएको थियो ।
