काठमाडौं । नेपाल टेलिकमले चालु आर्थिक वर्षको पहिलो नौ महिनामा दुई अर्ब ८४ करोड नाफा कमाएको छ । कम्पनीले सोमबार जारी गरेको चालु आर्थिक वर्ष २०८१/८२ को तेस्रो त्रैमासको वित्तीय विवरणअनुसार करपछिको नाफा ४८.६७ प्रतिशतले घटेको हो । गत वर्षको सोही अवधिमा यस्तो नाफा पाँच अर्ब ५३ करोड थियो । कम्पनीको कुल आय करिब ८.९० प्रतिशतले घटेर २८ अर्ब ४४ करोड ४८ लाख ४५ हजार रुपैयाँ पुगेको छ ।
गत आर्थिक वर्षको तेस्रो त्रैमास अवधिमा कम्पनीको कुल सञ्चालन आय ३१ अर्ब २३ करोड २३ लाख ८० हजार थियो । अन्तरिम वित्तीय विवरणअनुसार कम्पनीको कुल सञ्चालन आय २५ अर्ब ३१ करोड ७६ लाख १४ हजार रहेको छ । जुन गत वर्षको २५ अर्ब ४८ करोड १२ लाख ८९ हजारको तुलनामा ०.६५ प्रतिशत कम हो । त्यस्तै, कम्पनीको प्रतिसेयर आम्दानी पनि गत वर्षको ४१.०२ बाट घटेर २१.०५ रुपैयाँ कायम भएको छ ।
कम्पनीले नाफा घट्नुको कारण तीव्र बजार प्रतिस्पर्धा, ग्राहकको बदलिँदो व्यवहार, सस्तो प्याकेज माग र ओटिटी एपहरूको बढ्दो प्रयोगलाई मानेको छ । त्यस्तै, अन्तर्राष्ट्रिय र स्वदेशी भ्वाइस सेवाको आम्दानीमा कमी, प्राविधिक उपकरण अभाव र नियामक नीति परिवर्तनले पनि वित्तीय प्रदर्शनमा असर पारेको कम्पनीको भनाइ छ ।
कम्पनीको कुल सम्पत्ति हाल एक खर्ब २१ अर्ब ९० करोड ८५ लाख ८० हजार रहेको छ । गत आर्थिक वर्षको सोही अवधिमा कम्पनीको सम्पत्ति एक खर्ब ३३ अर्ब ६९ करोड ५४ लाख ६८ हजार थियो । यसबीचमा करिब ८.८० प्रतिशतले सम्पत्ति घटेको देखिन्छ भने खुद सम्पत्ति प्रतिसेयर ५०३.९३ र कुल सम्पत्ति प्रतिसेयर ६७६.३६ रहेको छ ।
नेपाल टेलिकमले प्रतिस्पर्धा सामना गर्न फोरजी र एलटिई र एफटिटिएच सेवाको विस्तार, भ्यालु एडेड सर्भिसहरूको विकास र ग्राहक सम्बन्ध व्यवस्थापन प्रणालीको प्रयोगलाई तीव्रता दिएको जनाएको छ । त्यस्तै, प्रतिस्पर्धी आइएसपीले मोबिलिटी वाईफाई सेवा दिएकाले प्रयोगमा उल्लेखनीय कमी भएको बताइएको छ । (हिमालय टाईम्सबाट)
