काठमाडौं । नेपालले पहिलोपटक आइसिसी महिला टी-२० विश्वकपको ग्लोबल छनोटमा स्थान बनाएको छ । संयुक्त अरब इमिरेट्स (युएई)लाई पाँच विकेटले पराजित गर्दै नेपालले सो स्थान बनाएको हो । सुपर-३ को शीर्ष दुईमा स्थान बनाउँदै नेपालले उक्त सफलता प्राप्त गरेको हो । यो हारसँगै युएई भने बाहिरिएको छ ।
अब नेपालले यसै वर्ष महिला टी-२० विश्वकपको ग्लोबल छनोट प्रतियोगिता खेल्नेछ । ग्लोबल छनोटमा नेपालसहित १० टोली सहभागी हुनेछन् । उक्त प्रतियोगितामा शीर्ष चार स्थान बनाउने टोलीले सन् २०२६ मा इंग्ल्याण्डमा हुने आइसिसी महिला टी-२० विश्वकप क्रिकेट प्रतियोगिता खेल्नेछन् ।
थाइल्याण्डको टेर्डथाइ क्रिकेट मैदानमा सोमबार टस हारेर पहिला ब्याटिङ गरेको युएईले निर्धारित २० ओभरमा सात विकेट गुमाएर ११४ रन बनायो । ११५ रनको लक्ष्य नेपालले तीन बल बाँकी रहँदा पाँच विकेट गुमाउँदै पूरा गर्यो । नेपालका लागि कप्तान इन्दु बर्माले अविजित ३०, रुविना क्षेत्रीले २३, सम्झना खड्काले २१ र पूजा महतोले १३ रन बनाउनुभयो ।
युएईका लागि मिसेल बोथ, सुरक्षा कोटे, वैष्णभी महेश र कप्तान इशा ओजाले समान एक विकेट लिनुभयो । युएईका लागि इशा ओजाले ३९, तीर्थ सतिशले २१, हिना होटचन्दनीले २० र लाभन्या केनीले १२ रन बनाउनुभयो । नेपालका लागि मनिषा उपाध्यायले चार, कविता कुँवरले दुई तथा राजमती ऐरीले एक विकेट लिनुभयो । विश्व वरीयतामा युएई १६औँ र नेपाल २१औँ स्थानमा छ ।
अब नेपालले आज (मंगलबार) सुपर-३ को आफ्नो दोस्रो तथा अन्तिम खेलमा घरेलु टोली थाइल्याण्डको सामना गर्नेछ । थाइल्याण्डले यसअघि नै ग्लोबल छनोटमा स्थान पक्का गरिसकेको छ ।
इन्दुको ‘प्लेयर अफ दि म्याच’ मनिषालाई
युएईविरुद्ध नेपालको कीर्तिमानी खेलको ‘प्लेयर अफ दि म्याच’ नेपालकी कप्तान इन्दु बर्मा घोषित हुनुभयो । खेलपछिको पोस्ट म्याच प्रेजेन्टेसनमा इन्दुले आफूले पाएको ‘प्लेयर अफ दि म्याच’को अवार्डको हकदार मनिषा उपाध्याय भएको भन्दै उहाँलाई बोलाएर त्यो अवार्ड दिनुभएको थियो ।
कप्तान इन्दुले खेलमा जितको हकदार सबै भए पनि मनिषाको प्रदर्शन उत्कृष्ट रहेको र त्यसलाई शब्दमा वयान गर्न नसकिने बताउनुभयो । मनिषाले युएईविरुद्ध चार विकेट आफ्नो नाममा गर्नुभएको थियो । उहाँले आफ्नो स्पेलमा मात्र २० रन खर्चिनुभएको थियो । इन्दुले आफूलाई दिएको सो अवार्ड मनिषाले भने पूर्वकप्तान रुविना क्षेत्रीलाई समर्पण गर्नुभयो । ‘म एकदम खुसी छु, अझ धेरै म रुविना दिदीका लागि किनभने उहाँको योगदान धेरै छ, त्यसैले सबैभन्दा खुसी छु,’ उहाँले भन्नुभयो, ‘मैले आफैंलाई प्रमाणित गर्नु थियो । आउने दिनमा पनि अवसर पाएँ भने आफूलाई प्रमाणित गर्दै जानेछु ।’
मैदानमा दौडिनु त्यति सजिलो छैन: सचिव खड्का
विश्व छनोटमा पुगेपछि नेपाल क्रिकेट संघ (क्यान) का सचिव पारस खड्काले नेपाली टोलीप्रति सम्मान व्यक्त गर्नुभएको छ ।
‘क्रिकेट खेलेर के हुन्छ र ?’ भन्ने मानसिकता राख्ने जमातबीच ती सबै चुनौतीहरू पार गर्दै हुर्किएर महिला क्रिकेटमा लाग्नुभएका बहिनीहरूप्रति सम्मान र कृतज्ञता,’ पारसले सामाजिक सञ्जालमा लेख्नुभएको छ, ‘नेपालमा हाम्रा बहिनीहरूले क्रिकेट खेल्ने इच्छा राख्नु नै ठूलो कुरा हो र अझै पनि ती सपनाहरू जीवित छन् ।’
खड्काले समाजमा फैलिएका नकारात्मक धारणा र प्रतिक्रियाहरूलाई एकछिनका लागि बिर्सेर राष्ट्रको प्रतिनिधित्व गर्दै आफ्नो जीवन क्रिकेटप्रति समर्पित गर्नु सजिलो कुरा नभएको पनि बताउनुभएको छ । यसकारण नेपाली महिला क्रिकेट टिमलाई ठूलो समर्थनका रूपमा ‘हौसला’ प्रदान गरेको उहाँको भनाइ छ ।
पारसले अगाडि लेख्नुभएको छ, ‘सामाजिक सञ्जालमा गाली गर्नु सजिलो छ तर मैदानमा दौडिनु त्यति सजिलो छैन । नेपाली महिला क्रिकेट टिमको योे जित कुनै आकस्मिक परिणाम होइन, यो त तपाईंहरूले ब्याट र बल समातेको पहिलो दिनदेखि नै सुनिश्चित भइसकेको भविष्य थियो ।’(हिमालय टाईम्सबाट)
