काठमाडौं । बागमतीलाई पराजित गर्दै मधेस प्रदेशले टिबी शाह स्मृति यू-१६ राष्ट्रिय क्रिकेट प्रतियोगिताको उपाधि जितेको छ । कर्णाली प्रदेशको राजधानी वीरेन्द्रनगर सुर्खेतमा शनिबार सम्पन्न अन्तिम खेलमा बागमतीलाई ७ विकेटले हराउँदै मधेसले उपाधि हात पारेको हो ।

बागमतीले दिएको ११३ रनको लक्ष्य मधेसले १३.४ ओभरमा ३ विकेट गुमाउँदै पूरा गरेको थियो । टस हारेर पहिला ब्याटिङको निम्ता पाएको बागमतीले निर्धारित ५० ओभरको खेलमा जम्मा ३३ ओभरमात्र खेल्दा आफ्नो सबै १० विकेट गुमाउँदै ११२ को सामान्य स्कोर बनायो । बागमतीका लागि ओपनरद्वय सूर्यांशु कोइरालाले सात बलमा १० जोड्दा राजीव कोइरालाबाट क्याच आउट भएपछि ४० बल खेल्नुभएका प्रसिद्ध जैसी २५ रन बनाउँदै रोहन यादवबाट रन आउट हुनुभयो ।

परिमार्जन यादवको बलमा सन्तु मण्डललाई क्याच थमाउँदै तेस्रो नम्बरका ब्याटर जोय थापा ६ रन जोडेर डग आउट फर्किंदा सलमान अली मुसलमानबाट बोल्ड हुँदै चौथो नम्बरका शिवशक्ति महतो जम्मा दुई रनमा आउट हुनुभयो । २३ बलमा ४ रन जोड्नुभएका अभि थपलिया सलमानको बलमा सन्तु मण्डलबाट क्याच आउट भएपछि धर्मराएको बागमतीको पारीलाई मिडल अर्डरका रोहित ठाकुरले ४६ बलमा २२ तथा आशिष गुप्ताले १७ रन जोड्दै सम्हाल्ने प्रयास गर्नुभयो ।

रोहन यादवले रोहितलाई एलबिडब्ल्यू तथा आशिषलाई बोल्ड गर्दै पवेलियन फर्काएपछि बागमतीको ब्याटिङ लाइन पनि खस्किँदै गएको थियो । त्यसपछिका ब्याटरमध्ये राजेश बोहोरा १ तथा कमल शाहीले नटआउट ४ रन जोडे पनि सुशील सावद र आसिक थापा रित्तो हात डगआउट फर्किन बाध्य हुँदा बागमतीले २१ रन अतिरिक्त पायो ।

यस्तै, जवाफी ब्याटिङमा उत्रिएको मधेसका लागि उपाधि दिलाउन ओपनर आयान मुखियाले ३३ बलको सामना गर्दै नटआउट २२ तथा पाँचौं अर्डरका सन्तु मण्डलले २२ बलमा ४३ रनको महत्वपूर्ण योगदान दिनुभयो । आयानसँगै ओपनिङमा आउनुभएका सुशान्त सिंहले १५ बलमा १२ रन बनाउनुभयो । परिमार्जन यादवले ४ रन र माहि यादवले ४ रन बनाएर आउट हुनुभयो ।

नेपाल क्रिकेट संघ (क्यान)को मुख्य आयोजना, कर्णाली प्रादेशिक क्रिकेट संघको सहआयोजना तथा सुर्खेत जिल्ला क्रिकेट संघको व्यवस्थापनमा जेठ १९ गतेदेखि सुरु भएको प्रतियोगितामा सात प्रदेशका टिमहरूको सहभागिता थियो ।