काठमाडौं । कप्तान विपिन शर्मा र ब्याटर प्रसिद्ध जैसीको उत्कृष्ट प्रदर्शनप्रेरित साबिक विजेता नेपालले एसिसी यू-१६ इस्ट जोन कपमा विजयी सुरुवात गरेको छ । मलेसियाको वाइएसडी युकेएम ओभलमा आइतबार सम्पन्न खेलमा नेपालले ६ विकेटको सहज जित दर्ता गर्यो । सिंगापुरले प्रस्तुत गरेको १३९ रनको लक्ष्य नेपालले ३३.३ ओभरमा चार विकेट गुमाउँदै पूरा गर्यो ।
नेपालका लागि प्रसिद्ध जैसीले नटआउट सर्वाधिक ५५ रन बनाउनुभयो । त्यस्तै, रौनक श्रीवास्तवले सर्वाधिक ४० रन बनाउनुभयो । शुभम खनाल अविजित रहँदै नौ रन बनाउनुभयो । नेपालका ओपनर सुर्यांशु कोइराला भने नौ रन बनाएको अवस्थामा रिटायर्ड हर्ट हुनुभएको थियो । सिंगापुरका लागि आकाश तेजाले तीन विकेट लिनुभयो । त्यस्तै, युवान पाण्डेले एक विकेट लिनुभयो ।
खेलमा टस जितेर पहिला ब्याटिङ रोजेको सिंगापुरले ३६.१ ओभरमा सबै विकेट गुमाउँदै १३८ रनको योगफल बनायो । सिंगापुरका लागि कप्तान रियन नायकले सर्वाधिक ५३ रनको योगदान दिनुभयो । त्यसैगरी ओपनर आहान भुधानभामले ३८ रन जोड्दा अर्का ओपनर रोशन अरुनले ११ बनाउँदै आउट हुनुभयो । सिंगापुरलाई सस्तैमा समेट्ने क्रममा नेपालका कप्तान विपिन शर्माले चार विकेट लिनुभयो । त्यसैगरी सचिन भट्टले तीन तथा शुभम खनाल र अभय यादवले समान एक-एक विकेट लिनुभयो ।
एसियाली क्रिकेट परिषद् (एसिसी)को वार्षिक कार्यतालिकाअनुसार सञ्चालन भएको उक्त प्रतियोगितामा विभिन्न १० टोलीको सहभागिता रहेको छ । प्रतियोगितामा नेपाल समूह ‘ए’मा रहेको छ । नेपालको समूहमा सिंगापुर, इण्डोनेसिया, भुटान र जापान छन् । त्यस्तै, समूह ‘बी’मा आयोजक मलेसियासहित हङकङ, माल्दिभ्स, थाइल्याण्ड र म्यानमार रहेका छन् । अब नेपालले मंगलबार जापानको सामना गर्नेछ ।
