सिंजा । सिंजा गाउँपालिका पोषणमैत्री पालिका घोषणा गरिएको छ । पालिकाका सम्पूर्ण स्वास्थ्य संस्थालाई पोषण मैत्री घोषणा गरिएको हो । पालिकाभित्र रहेका स्वास्थ्य चौकी, आधारभूत स्वास्थ्य केन्द्रलगायत सबै स्वास्थ्य संस्थाहरुलाई जुम्लाकै पहिलो पालिकाका रुपमा पोषण मैत्री घोषणा गरिएको हो ।
सिंजाका गाउँपालिकामा रहेका ३ वटा स्वास्थ्य चौकी र ३ वटा आधारभूत स्वास्थ्य केन्द्र र पाेषणका १६ वटा सूचक पूरा गरी पूर्ण पोषणमैत्री घोषणा गरिएको हो । दिगो विकास लक्ष्यअनुसार सन् २०३० सम्म नेपालमा सबै प्रकारका कुपोषण अन्त्य गरी पोषणमैत्री मुलुक घोषणा गर्ने संकल्प गरिएको छ । कर्णाली प्रदेशका ७९ वटा स्थानीयतह मध्ये जुम्लाकाे सिंजा गाउँपालिका पोषणमैत्री घोषणा हुने पहिलो पालिका बनेको छ । सोमबार प्रतिनिधि सभा सदस्य विनिता कठायतले एक औपचारिक कार्यक्रमका बीच सिंजाका स्वास्थ्य संस्थालाई पोषणमैत्री घोषणा गरेकी हुन् ।
घोषणा कार्यक्रमपछि बोल्दै प्रतिनिधि सभा सदस्य कठायतले पहिलो पोषणमैत्री पालिका घोषणा गरेर सिंजाले कर्णालीमै नमुना काम गरेको बताइन् । ‘अब विद्यालयमा पूर्ण रुपमा पोषणयुक्त खाजा खुवाउने व्यवस्थापन गर्नुपर्छ । जुम्लाका आठै पालिकामध्ये पहिलो पालिकाका रुपमा पोषण मैत्री घोषणा हुनु सुखद पक्ष हो । घोेषणा कार्यान्वयन र स्थानीय उत्पादन वृद्विमा जोड दिन जरुरी छ,’ उनले भनिन् । शारीरिक, मानसिक रुपमा आमा तथा बच्चालाई स्वास्थ राख्नका लागि पोषणमा ध्यान दिन जरुरी रहेको उनको भनाइ थियो ।
उनले स्थानीय सरकारले नीति तथा कार्यक्रममै पोषणका सवाललाई प्राथामिकता दिन सुझाव दिइन् । कठायतले बालबालिका भविष्यका कर्णदार भएकाले उनिहरुको पोषण अबस्था सुधारसँगै शिक्षा स्वास्थ्यमा पनि ध्यान दिनु पर्ने उल्लेख गरिन् । सिंजा गाउँपालिका अध्यक्ष पूर्णप्रसाद धितालले सिंजाले हालसम्म गरेका महत्वपूर्ण काम मध्य पोषणमैत्री स्वास्थ्य संस्था घोषणा एक ऐतिहासिक काम भएको बताए । उनले पालिकाले सुरुदेखिनै शिक्षा, स्वास्थ्य, पोषण सुधारमा काम गर्दै आएको प्रतिफल देखिएको उल्लेख गरेका छन् । सिंजाको विकास तथा समृद्विका लागि प्लान इन्टरनेशनल नेपाल र पेस नेपालले गरेको योगदान तथा सहयोग समन्वय प्रसंशायोग्य रहेको उनको भनाइ छ । पेस नेपाल जुम्लाका कार्यकारी निर्देशक किशोर न्यौपानेले सिंजा गाउँपालिकाले तोकिएका सबै १६वटा सूचक पूरा गरेर जुम्लाकै पहिलो पोषणमैत्री पालिका घोषणा गर्न सफल भएको छ । घोषणा गर्नु मात्रै महत्वपूर्ण नभई व्यवहारमा कार्यान्वयन गरी पोषणमा सुधार ल्याउन जरुरी रहेकाले उत्पादन बढाउन तथा खानपानमा ध्यान दिन उनले आग्रह गरे ।
सिंजा गाउँपालिका स्वास्थ्य शाखा प्रमुख ललित रोकायाले तोकिएका १६ वटा सूचकहरुलाइ पूरा गरेर जुम्लाकै पहिलो स्वास्थ्य संस्था पोषण मैत्री घोषणा गर्न सफल भएको बताए साथै स्वास्थ्य चौकीलाई पोषणमैत्री स्वास्थ्य संस्था घोषणा पश्चात सबै सुचकहरुलाई कायम राख्दै थप बलियो बनाउने राेकायाले बताए ।उनकाअनुसार पोषणमैत्री स्वास्थ्य संस्था घोषणा कार्यक्रम सम्म विभिन्न तवरबाट सहयोग तथा योगदान दिने सरोकारवालाई समेत सम्मान पत्र हस्तान्तरण गरिएको छ । ‘यसअघि सिंजा गाउपालिकामा पोषण प्रर्दशनी मेला आयोजना गरिएकाे थियाे । आज पोषणमैत्री स्वास्थ्य संस्था घोषणा गर्न सफल भयौं,’ उनले भने, ‘रैथाने वालीको उपभोग बढाएर मातृशिशुमा हुने कूपोषणलाई शुन्यमा झार्ने र आम नागरिकलाई असल खानपानका विषयमा सिंजाले उल्लेखनीय काम गरेको छ ।’ सिंजा गाउँपालिका, पेस नेपाल र प्लान इन्टरनेशनल नेपालको समन्वय सहकार्यमा सिंजाका स्वास्थ्य संस्थाहरु पोषणमैत्री घोषणा भएका हाे । सिंजा गाउँपालिकाले घरमा हुने सुत्केरी दरलाई शुन्यमा झार्ने लक्ष्य पनि लिएकाे छ ।
