काठमाडौं । स्वास्थ्य तथा जनसंख्यामन्त्री प्रदीप पौडेलले थाइल्याण्डमा क्रियाशील स्वास्थ्य नीति निर्माता, बौद्धिक तथा अध्ययनरत मेडिकल विद्यार्थीसँग नेपालको स्वास्थ्य क्षेत्रमा थाइल्याण्डको अनुभवबाट गर्न सकिने सुधारबारे अन्तरक्रिया सुरु गर्नुभएको छ । जनसंख्या नीति सम्बद्ध संयुक्त राष्ट्रसंघीय मन्त्रीस्तरीय बैठकमा सहभागिताका लागि बैंकक पुग्नुभएका उहाँले त्यहाँका नेपालीहरूसँग विचारविमर्श गर्नुभएको हो । नेपाली राजदूतावासको आयोजनामा बैंककमा आयोजित कार्यक्रममा मन्त्री पौडेलले थाइल्याण्डको स्वास्थ्य उपचार प्रणाली, मेडिकल शिक्षा तथा स्वास्थ्य बीमाबारेमा थाइल्याण्डको अनुभवबारे नेपाली समुदायसँग सुझाव संकलन गर्नुभएको स्वास्थ्यमन्त्रीको सचिवालयले जनाएको छ ।

उहाँले अहिले मन्त्रालयले स्वास्थ्य उपचार सेवा सुधार तथा विस्तारसँगै स्वास्थ्य बीमामा नीतिगत सुधारसम्बन्धी निर्णय गरेर कार्यान्वयनतर्फ अघि बढिरहेको भन्दै दुवै देशको परिस्थितिबारे जानकार नेपालीहरूबाट प्राप्त अनुभव आगामी दिनमा थप उपयोगी हुने विश्वास व्यक्त गर्नुभयो । मन्त्री पौडेलले भन्नुभयो, ‘हामी अहिलेकै स्रोतमा सुधार गरेर नागरिकलाई बढी सेवा दिन प्रयत्नशील छौं, तपाईंहरूको अनुभव हाम्रा लागि उपयोगी बन्न सक्छ ।’

नेपाली राजदूत धनप्रसाद ओलीले थाइल्याण्डमा चिकित्सा उच्च शिक्षा, चिकित्सा अभ्यास तथा नीति निर्माणसँगै व्यवसायमा संलग्न रहेको भन्दै उनीहरूको अनुभव आदानप्रदानले आगामी दिनमा थप सम्भावना र सहकार्यको मार्ग प्रशस्त गर्ने बताउनुभयो । अन्तरक्रियामा सहभागी स्वास्थ्य सेवाप्रदायक एप निर्माणमा संलग्न नेपालीहरूले आफ्नो सेवा स्वदेशमा विस्तारमा तयार रहेको बताएका थिए । मन्त्री पौडेलले राष्ट्रसंघीय मन्त्रीस्तरीय बैठकमा नेपालतर्फबाट सम्बोधन तथा छलफलमा सहभागिता जनाउनुका साथै गैरआवासीय नेपालीहरूसँग समेत अन्तरक्रिया गर्ने कार्यक्रम रहेको सचिवालयले जनाएको छ ।