काठमाडौं । मच्छिन्द्र र जावलाखेल क्लबले एन्फा यू-१६ युथ लिगमा जित निकालेका छन् । एन्फा मैदान सातदोबाटोमा मंगलबार भएको खेलमा मच्छिन्द्रले प्लानिङ ब्वाइज युनाइटेडलाई ७-० गोलले हरायो । एकपक्षीय खेलमा मच्छिन्द्रलाई जिताउन किरण धामी र समुन बम ठकुरीले दुई-दुई गोल गर्नुभयो ।

विकास थापा, राहुलकुमार योञ्जन र आर्यवीर सिंहले एक-एक गोल गर्नुभएको थियो । लिगमा लगातार दोस्रो जित निकालेको मच्छिन्द्रले ६ अंक बनाएको छ ।

पहिलो हार खेपेको प्लानिङको दुई खेलबाट तीन अंक छ । मच्छिन्द्रले पहिलो खेलमा एपिएफ र प्लानिङले सातदोबाटो युथ क्लबलाई हराएको थियो ।

यस्तै, अर्को खेलमा जावलाखेल युथ क्लबले विभागीय टोली त्रिभुवन आर्मी क्लबलाई तीन-दुई गोलले हरायो । प्रतिस्पर्धात्मक खेलमा जावलाखेलका लागि विशाल शाहीले दुई गोल गर्नुभयो भने अर्को गोल प्रिन्स भुजेलले थप्नुभयो ।

आर्मीका लागि निरज अधिकारी र सोहित वाइबाले एक-एक गोल फर्काउनुभएको थियो । दोस्रो खेलमा पहिलो जित निकालेको जावलाखेलले तीन अंक बनाएको छ ।

समान खेलमा पहिलो हार खेपेको आर्मीको पनि तीन अंक छ । अखिल नेपाल फुटबल संघ (एन्फा) ले आयोजना गरेको लिगमा ‘ए’ डिभिजनका १४ क्लबको सहभागिता छ ।

लिगको विजेता टोलीले एक लाख रुपैयाँ र उपविजेताले ५० हजार रुपैयाँ पुरस्कार पाउनेछ । यस्तै, व्यक्तिगत विधाका उत्कृष्ट खेलाडी र अनुशासित टोलीलाई १५/१५ हजार रुपैयाँ प्रदान गरिने एन्फाले जनाएको छ ।