काठमाडौं । नेपाल स्ट्रिट प्रिमियर लिग टी-१० क्रिकेट प्रतियोगिता आगामी असोजमा काठमाडौंमा आयोजना हुने भएको छ । डिजिआर स्पोट्र्स एण्ड इभेन्ट म्यानेजमेन्ट प्रालिले काठमाडौंमा पत्रकार सम्मेलन गर्दै आगामी असोज १५ देखि २४ गतेसम्म काठमाडौंको तल्लो मूलपानी मैदानमा स्ट्रिट प्रिमियर लिग टी-१० क्रिकेट प्रतियोगिता आयोजना गर्न लागेको जनाएको हो ।

प्रतियोगितामा सातवटा टिम सहभागी हुने र कुल २२ खेल खेलाइने नेपाल स्ट्रिट प्रिमियर लिगका अध्यक्ष ज्ञानु सिंहले जानकारी दिनुभयो । सिंगल राउण्ड रोबिन लिगका आधारमा खेलाइने लिगमा शीर्ष चार टोली सेमिफाइनलमा प्रवेश गर्ने उहाँले बताउनुभयो । अध्यक्ष सिंहले विजेता टिमले २९ लाख रुपैयाँ तथा उपविजेता टिमले ११ लाख रुपैयाँ पुरस्कार प्राप्त गर्ने जानकारी दिनुभयो ।

प्रतियोगितामा सहभागी हुन टिम खरिद गर्नुपर्ने र खेलाडीको अक्सन हुने आयोजकले जनाएको छ । यसैबीच आयोजकले प्रतियोगिताको ब्राण्ड एम्बेसडरका रूपमा नायक निखिल उप्रेतीलाई आबद्ध गरेको छ ।