काठमाडौं । नेपाल खेलकुद पत्रकार मञ्च (एनएसजेएफ) ले प्रत्येक वर्ष आयोजना गर्दै आएको पल्सर स्पोट्र्स अवार्ड को २२औं संस्करण पोखरामा हुनेभएको छ । शुक्रबार काठमाडौंमा एक कार्यक्रबीच मञ्चले यस वर्षको अवार्ड कार्यक्रम पहिलोपटक उपत्यका बाहिर पोखरामा गर्न लागिएको जानकारी गराएको हो । मञ्चका अध्यक्ष निरञ्जन अधिकारीका अनुसार, पोखरा भ्रमण वर्षलाई समेत मध्यनजर गर्दै प्रायोजकको सल्लाहमा आगामी भदौ २९ गते पोखरामा गर्न लागिएको हो ।
यस संस्करणमा १० विधा समावेश गरिएको छ । जसमा वर्षका उत्कृष्ट खेलाडी (पुरुष, महिला, युवा), उत्कृष्ट प्रशिक्षक, पिपल्स च्वाइस अवार्ड, पारा एथलिट सम्मान, स्पेशल अवार्ड, टिम अफ दि इयर, लाइफटाइम एचिभमेन्ट अवार्ड र एसियन स्पोट्र्स जर्नालिष्ट अवार्ड रहेका छन् ।
वर्ष खेलाडी (पुरुष, महिला, युवा), प्रशिक्षक र पिपल्स च्वाइस अवार्डका लागि पाँच-पाँचजनाको मनोनयन केही दिनमै सार्वजनिक गरिने जनाइएको छ । टिम अफ दि इयर, लाइफटाइम एचिभमेन्ट, स्पेशल अवार्ड, पारा एथलिट र एसियन स्पोट्र्स जर्नालिष्ट अवार्डमा भने मनोनयन हुने छैन । सबै विजेताको घोषणा कार्यक्रमकै दिन गरिनेछ । पाँच विधाका विजेताले पल्सर मोटरसाइकल प्राप्त गर्नेछन् भने अन्य विधामा जनही एक लाख रुपैयाँ नगद पुरस्कार दिइने मञ्चले जनाएको छ ।
यसै अवसरमा मञ्च र गोल्छा ग्रुपबीच पाँच वर्षका लागि पल्सर मोटरसाइकल प्रायोजनसम्बन्धी सम्झौता नवीकरण गरिएको छ । सम्झौतामा मञ्चका अध्यक्ष अधिकारी र गोल्छा ग्रुपका निर्देशक अभिमन्यु गोल्छाले हस्ताक्षर गर्नुभएको छ । गोल्छाका अनुसार यसपटक ४० लाख रुपैयाँबराबरको सहयोग गरिनेछ, जुन गत वर्षभन्दा ३३ प्रतिशतले बढी हो । पल्सरसँगको यो १७ वर्षदेखि निरन्तर सहकार्य हो ।
यस अवार्डको गतवर्षका विजेतामा पुरुषतर्फ क्रिकेटका रोहित पौडेल, महिलातर्फ करातेकी एरिका गुरुङ, युवातर्फ भारोत्तोलनका हेमन्त पाल र प्रशिक्षकतर्फ करातेका कुशल श्रेष्ठ रहनुभएको थियो ।
पिपल्स च्वाइस अवार्ड भलिबलकी कविता भट्टले प्राप्त गर्नुभएको थियो भने स्पेशल अवार्डबाट भलिबल प्रशिक्षक कुमार राई, पारा एथलिट सम्मानबाट पलेशा गोवद्र्धन, एसियन स्पोट्र्स जर्नालिष्ट अवार्डबाट दक्षिण कोरियाका ही डोङ जोङ र लाइफटाइम एचिभमेन्ट अवार्डबाट पूर्वक्यान अध्यक्ष विनयराज पाण्डे सम्मानित हुनुभएको थियो । एसियाली खेलकुदमा ऐतिहासिक कांस्य पदक जित्ने महिला कबड्डी टोलीलाई टिम अफ दि इयर अवार्ड प्रदान गरिएको थियो ।(हिमालय टाईम्स)
