काठमाडौं । नेपाल भ्रमणमा रहनुभएका रोजगारदाताहरूको अन्तर्राष्ट्रिय संगठन (आइओई) का महासचिव रोबर्टो सुवारेज सान्तोसले औद्योगिक सम्बन्ध सुधारमा नेपाल उद्योग वाणिज्य महासंघले निर्वाह गरेको भूमिकाको प्रशंसा गर्नुभएको छ । महासंघका अध्यक्ष चन्द्रप्रसाद ढकाल र पदाधिकारीसँगको भेटमा उहाँले उक्त प्रशंसा गर्नुभएको हो । महासंघका अध्यक्ष ढकालको निमन्त्रणामा आउनुभएका सान्तोषले हालै सहमतिमा भएको न्यूनतम ज्याला निर्धारण, सामाजिक सुरक्षा र औपचारिकीकरणमा महासंघको भूमिका अनुकरणीय भएको बताउनुभएको महासंघले जनाएको छ । साथै उहाँले सरकार र ट्रेड युनियनहरूको रचनात्मक भूमिका रहेको पनि बताउनुभयो । यसै वर्ष जेनेभामा सम्पन्न अन्तर्राष्ट्रिय श्रम सम्मेलनमा अध्यक्ष ढकाल र महासचिव सान्तोसबीच भएको भेटवार्ताका क्रममा अध्यक्ष ढकालले उहाँलाई नेपाल भ्रमणको निम्तो दिनुभएको थियो ।

महासंघमा भएको भेटवार्ताका क्रममा महासंघका अध्यक्ष ढकालले नेपालको २०२६ मा हुने अतिकम विकसित मुलुकबाट स्तरोन्नति र त्यसले नेपालको अन्तर्राष्ट्रिय व्यापारमा पार्ने प्रभावमा आइओईको सहजीकरणका विषयमा चर्चा गर्नुभएको थियो ।
साथै उहाँले निजी क्षेत्रको प्रतिस्पर्धात्मक क्षमता अभिवृद्धिलगायतमा आइओईको सहयोग आवश्यक रहेको बताउनुभयो । ढकालले भन्नुभयो, ‘नेपालको २०२६ मा एलडिसी स्तरोन्नति हुँदा हामीसँग अवसर र चुनौती दुवै छन् । यसबाट अगाडि बढ्न आइओईका अनुभव आदानप्रदान, विश्व समुदायमा नेपालको पक्षमा पैरवी र सहकार्यका लागि हामी आइओईको सहयोगको अपेक्षा गर्दछौं ।’

नेपालमा लगानीको वातावरण सिर्जना गर्न, सरकार रोजगारदाता र श्रमिक संगठनबीच सुमधुर सम्बन्ध कायम राख्दै औद्योगिक वातावरण निर्माण गर्न महासंघले सधैं उल्लेखनीय काम गर्दै आएको पनि उहाँले जानकारी गराउनुभयो । ढकालले स्तरोन्नतिपछिको अवस्थामा अन्तर्राष्ट्रिय क्षेत्रमा आवश्यक सहजीकरणका लागि आइओई सधैं सकारात्मक रहेको बताउनुभयो । नयाँ अवसरहरूमा नेपालका उद्यमीहरूलाई जोड्न पनि सहजीकरण गर्ने बताउनुभयो ।

सो अवसरमा महासंघका उपाध्यक्ष हेमराज ढकाल, महासंघका उपाध्यक्ष तथा रोजगारदाता परिषद् सभापति ज्योत्सना श्रेष्ठ, कोषाध्यक्ष भरतराज आचार्य, महासंघका केन्द्रीय सदस्य तथा परिषद्का उपसभापति बाबुकाजी कार्की र अरनिको राजभण्डारीलगायतले नेपालमा रोजगारदाता र श्रमिकबीच असल सम्बन्ध निर्माण तथा औद्योगिक वातावरणका विषयमा धारणा राखेका थिए ।

१९२० मा स्थापना भई जेनेभामा मुख्यालय रहेको आइओई विश्वकै सबैभन्दा ठूलो निजी क्षेत्रको सञ्जाल हो । जसले एक सय ४० भन्दा बढी देशमा रहेका एक सय ५० भन्दा धेरै रोजगारदाताहरूको संगठनहरूलाई प्रतिनिधित्व गर्छ । नेपालमा महासंघ आइओईको सदस्य हो ।(हिमालय टाईम्स)