काठमाडौं । पछिल्लो समय अनलाइन प्लेटफर्मको प्रयोगसँगै बालबालिकामाथि हुने दुरुपयोग र यौन दुर्व्यवहारका घटनाहरू बढ्दै गएका छन्। विशेषगरी सामाजिक सञ्जालको अत्यधिक प्रयोगले यस्तो समस्यालाई थप चर्काएको विश्लेषण हुँदै आएको छ।
यसै सन्दर्भमा, नेपाल सरकारले माध्यमिक तहको कम्प्युटर विज्ञान विषयमा अनलाइन बालसंरक्षणसम्बन्धी पाठ्यवस्तु समावेश गरेको छ। यसैका आधारमा पाठ्यक्रम विकास केन्द्रको आयोजनामा र सिविन नेपालको सहकार्यमा हेटौंडामा कम्प्युटर विषय अध्यापन गर्ने शिक्षकहरूलाई लक्षित गरी विशेष तालिम कार्यक्रम सम्पन्न भएको छ। सिविन नेपालका प्रवन्धक माधव लोहनीको सभाध्यक्षतामा सम्पन्न उक्त कार्यक्रममा शिक्षा विकास निर्देशनालयका महानिर्देशक खुबिराम अधिकारी प्रमुख अतिथि रहनुभएको थियो।
तालिममा पाठ्यक्रम विकासकर्ता तथा कम्प्युटर विज्ञान लेखक बिमल थापाले मकवानपुर जिल्लाका ४१ जना शिक्षकहरूलाई प्रशिक्षण दिनुभएको थियो। हाल मकवानपुर जिल्लाको हेटौंडा उपमहानगरपालिका, मकवानपुरगढी गाउँपालिका र मनहरी गाउँपालिकाका ४१ विद्यालयमा माध्यमिक तहमा कम्प्युटर विज्ञान विषय पढाइ हुँदै आएको छ। कार्यक्रममा ती विद्यालयहरूमा कक्षा ९ र १० मा अध्यापन गर्ने ४० जना शिक्षकहरूको सक्रिय सहभागिता रहेको थियो।
कार्यक्रममा पाठ्यक्रम विकास केन्द्रका विषयविज्ञ खिलनाथ धमला, शिक्षा विकास तथा समन्वय एकाइका प्रमुख सुदीप गिरी, राष्ट्रिय परीक्षा बोर्डका प्रमुख बद्री पाठक, हेटौंडा उपमहानगरपालिका शिक्षा विकास महाशाखाका अधिकृत हरिचन्द्र सापकोटा, मकवानपुरगढी शिक्षा विकास शाखा प्रमुख रामकुमार घलान, सिविन नेपाल मकवानपुरका प्रवन्धक झविन्द्र ज्ञवाली तथा भुटनदेवी माविका सहायक प्रधानाध्यापक भरत पोखरेल लगायतको उपस्थिति रहेको थियो।
सिविन नेपालका प्रवन्धक लोहनीले तालिमको उद्देश्य शिक्षकमार्फत् बालबालिकालाई अनलाइनमा कसरी सुरक्षित राख्ने भन्ने सन्देश र चेतना प्रवाह गर्ने रहेको बताउनुभयो। उहाँका अनुसार पाठ्यक्रममा समावेश विषयवस्तुहरू अनलाइन सुरक्षा, कानुनी व्यवस्था, रोकथामका उपाय र सचेतना अभिवृद्धिमा केन्द्रित छन्।
सिविन नेपाल विगत तीन वर्षदेखि अनलाइन बालसंरक्षण सम्बन्धी अध्ययन, अनुसन्धान, सरोकारवालासँगको समन्वय तथा सहकार्य गर्दै आएको छ। पाठ्यक्रम विकास केन्द्रसँग सहकार्यमा संचालन गरिएको यो कार्यक्रम सिविनको दीर्घकालीन प्रयासको सफल परिणाम भएको सिविन मकवानपुरका प्रवन्धक झविन्द्र ज्ञवालीले जानकारी दिनुभयो।
ज्ञवालीका अनुसार यो परियोजना गण्डकी र बागमती प्रदेशका विभिन्न जिल्लामा विस्तार गरिँदैछ। गण्डकी प्रदेशबाट थालिएको कार्यक्रम आगामी दिनमा बागमतीका अन्य जिल्लाहरूमा पनि क्रमशः संचालन गरिनेछ ।(हिमालय टाईम्स)
