काठमाडौं । नेपाल उद्योग परिसंघ(सिएनआई) युवा उद्यमी मञ्च(सिएनआइवाइइएफ) को अध्यक्षमा मनिष श्रेष्ठ चयन हुनुभएको छ । शुक्रबार पोखरामा सम्पन्न मञ्चको वार्षिक साधारणसभाले सन् २०२५-२०२६ का लागि श्रेष्ठको अध्यक्षतामा नयाँ कार्यसमिति गठन गरेको हो । काजी स्टुडियोका संस्थापक श्रेष्ठ विगत चार वर्षदेखि मञ्चमा आबद्ध हुनुहुन्छ ।
मञ्चका निवर्तमान अध्यक्ष आशिष अग्रवालले नवनिर्वाचित अध्यक्ष श्रेष्ठलाई शपथ ग्रहण गराउनुहुँदै पदभार हस्तान्तरण गर्नुभयो । श्रेष्ठको कार्यसमितिमा सुगम घिमिरे (लर्निङ चेयर), पुनित अग्रवाल (मेम्बर इन्टिग्रेसन चेयर), निदा दुन मल्ल (ग्रोथ एण्ड एक्सपान्सन चेयर), यश अग्रवाल (फाइनान्स चेयर), अंकुर अग्रवाल (इन्टरनेसनल रिलेसन्स चेयर), चिराग सरावगी (स्टार्टअप चेयर), साइनी खेतान (नेटवर्क एण्ड कम्युनिकेसन चेयर) र सुजित रेग्मी (स्टार्टअप को-चेयर) चयन भएका छन् ।
मञ्चको वार्षिक साधारणसभामा सबैभन्दा सक्रिय सदस्यको अवार्ड सुदयकान्त झाले प्राप्त गर्नुभयो । सबैभन्दा बढी सदस्यता बढाउने सिएनआइवाइफ लुम्बिनीलाई अवार्ड प्रदान गरिएको छ भने मञ्चबाट सार्क ट्यांक नेपालमा सहभागी हुने मनिष श्रेष्ठ, सुजित रेग्मी र अरुण अग्रवाललाई टोकन अफ लभ प्रदान गरिएको सिएनआईले जनाएको छ । युवा उद्यमी मञ्च सन् २००८ मा गठन भएको सिएनआईको युवा संगठन हो । मञ्चले युवा उद्यमीलाई प्रोत्साहन, प्रवद्र्धन गर्ने कार्यलाई पहिलो प्राथमिकतामा राख्दै आएको छ ।(हिमालय टाईम्स)
