काठमाडौं । नेपालका चर्चित साधक रामचन्द्र ढकाल गुरुदेव र अन्तर्राष्ट्रिय स्तरमा ख्यातीप्राप्त वाचनप्रविण एवं अध्यात्म चेतनाका प्रवर्तक पण्डित श्री दिनबन्धु पोखरेल कथावाचनका सिलसिलामा सुनवलमा पुग्नुभएको छ । उहांको कथावाचन सुन्न विभिन्न जिल्लाहरुबाट भक्तजनको विशाल उपस्थिति देखिएको छ ।

श्री हरिहर ॐ कारेश्वर महादेव सेवा समिति, सुनवलद्वारा आयोजित श्री हरिहर ॐ कारेश्वर महादेव मन्दिरको सर्वाङ्गीण विकास, अक्षयकोष स्थापनार्थ, धार्मिक एवं आध्यात्मिक चेतना जागरणका लागी मिति २०८२ श्रावण १ गते देखि ३१ गतेसम्म ॐ कारेश्वर राष्ट्र कल्याण विश्व शान्ति श्रावणी महोत्सव-२०८२ सुनवल १० खखरीबारीमा शुरु भएको छ । सुनवल १० खखरीबारीमा अवस्थित श्री हरिहर ॐ कारेश्वर महादेव मन्दिर प्राङ्गणमा यो हप्ता हजारौ श्रद्धालु भक्तजनहरुको उपस्थिति रहेको थियो । वाचनप्रविण एवं अध्यात्म चेतनाका प्रवर्तक पण्डित श्री दिनबन्धु पोखरेलज्यूको कथावाचन श्रवणका लागी देशका बिभिन्न ठाउबाट श्रद्धालु भक्तजनहरुको विशाल उपस्थिति भएको थियो । “पण्डित श्री दिनबन्धु पोखरेलज्यूको  कथावाचन श्रवणका लागी पत्याउनै गार्हो पर्ने गरी हजारौको संख्यामा भक्तजनको उपस्थिति रहेको थियो”, एक सहभागीले बताए । यस अवसरमा नगद तथा जिन्सी सहयोग गर्ने सहयोगी मनहरुलाई उच्च सम्मान प्रदान गरिएको थियो ।