काठमाडौं । नेपाली सृजना क्षेत्रका ज्येष्ठ पुरस्कार मानिन्छ,मदन पुरस्कार । हो, यही मदन पुरस्कार बितरण गर्ने चर्चित गुठीको मदन पुरस्कार गुठीको बैठकले यस वर्षको मदन पुरस्कार-२०८१ दार्जिलिङका साहित्यकार छुदेन काविमोको उपन्यास ‘उरमाल’ लाई प्रदान गर्ने निर्णय गरेको छ । त्यस्तै, नेपाली लोकभाका संकलन र संरक्षणमा जीवनभर योगदान पुर्याउँदै नेपाली लोकसंस्कृतिलाई समृद्ध बनाउन सक्रिय रहनुभएका प्रेमदेव गिरिलाई यस वर्षको जगदम्बा-श्री सम्मान प्रदान गरिने भएको छ ।

दार्जिलिङ निवासी लेखक छुदेन काविमो नेपाली साहित्यमा लामो समयदेखि सक्रिय हुनुहुन्छ । उहाँका उपन्यास ‘उरमाल’ले चियाबारीका कथाहरूमार्फत दार्जिलिङका जनजीवन, श्रमिक समुदायको पीडा र सामाजिक-सांस्कृतिक वास्तविकतालाई कलात्मक ढंगले प्रस्तुत गरेको बताइएको छ ।

मदन पुरस्कार गुठीले यसअघि उत्कृष्ट कृतिहरूको छोटो सूची सार्वजनिक गरेको थियो । सूचीमा रमेश भुसालको नियात्रा ‘छालबाटो ः कैलाशदेखि गंगासम्म’, कुमारी लामाको निबन्धसंग्रह ‘दज्र्यु संलाप’, मनप्रसाद सुब्बाको कवितासंग्रह ‘पञ्चतत्त्वको पालाम’, श्रेयज सुवेदीको कथासंग्रह ‘बहुरूपी’, सुधिर शर्माको गैरआख्यान ‘भिक्षु, व्यापार र विद्रोह’ र तीर्थ गुरुङको उपन्यास ‘हिउँको गीत’ रहेका थिए ।

त्यसैगरी, प्रेमदेव गिरि विगत केही दशकदेखि लोकगीत, भाका र मौलिक धुनहरूको संरक्षण तथा प्रवद्र्धनमा सक्रिय रहँदै आउनुभएको छ । उहाँले नेपालका विभिन्न भूभागमा प्रचलित लोपोन्मुख भाकाहरू संकलन गर्दै पुस्तौंदेखिका मौखिक परम्पराहरूलाई पुस्तक र ध्वनिमार्फत जीवन्त राख्ने प्रयास गर्दै आउनुभएको छ । मदन पुरस्कार गुठीका अनुसार, पुरस्कार तथा सम्मानको औपचारिक वितरण कार्यक्रमको मिति पछि सार्वजनिक गरिनेछ ।