काठमाडौं । आगामी फागुन २१ गतेका लागि तोकिएको प्रतिनिधि सभा निर्वाचनको तयारीबारे प्रधानमन्त्री सुशीला कार्की र निर्वाचन आयोगका पदाधिकारीबिच सोमबार छलफल भएको छ।

छलफल प्रधानमन्त्री तथा मन्त्रिपरिषद्को कार्यालय, सिंहदरबारमा भएको हो। बैठकमा प्रधानमन्त्री कार्कीले निर्वाचनलाई स्वच्छ, स्वतन्त्र, भयरहित, निष्पक्ष र मितव्ययी ढङ्गले सम्पन्न गर्नु सरकारको उच्च प्राथमिकता रहेको बताउँदै आयोगलाई आवश्यक स्रोत–साधन, जनशक्ति र शान्ति–सुरक्षाको भरपर्दो व्यवस्था मिलाइने आश्वासन दिनुभयो। उहाँले निर्वाचनका लागि अनुकूल वातावरण बनाउन सरकारले निरन्तर सरोकारवालासँग परामर्श र सहकार्य गर्ने उल्लेख गर्दै आयोगलाई तयारीका सम्पूर्ण कार्य तत्काल अघि बढाउन आग्रह गर्नुभयो।

आयोगतर्फबाट कार्यवाहक प्रमुख निर्वाचन आयुक्त रामप्रसाद भण्डारीले निर्वाचन सम्पन्न गर्न आवश्यक पर्ने मतपेटिकासहितका सामग्री मौज्दातमा नै रहेको जानकारी दिनुभयो। अभाव हुने सामग्री भने स्वदेशमै उत्पादित वस्तुलाई प्राथमिकता दिँदै प्रतिस्पर्धात्मक ढङ्गले खरिद गरिने उहाँको भनाइ थियो। राजनीतिक दल, नागरिक समाज र सञ्चारजगतसहित सबै सरोकारवालासँग समन्वय गर्दै निर्वाचन सम्पन्न गर्ने प्रतिबद्धता भण्डारीले व्यक्त गर्नुभयो।

उहाँले निर्वाचन सुरक्षाको भरपर्दो प्रबन्ध मिलाइदिन सरकारसँग आग्रह गर्दै आयोगलाई नेपाल सरकार, राजनीतिक दल र आम नागरिकबाट निरन्तर सहयोगको अपेक्षा रहने विश्वास पनि व्यक्त गर्नुभयो।

छलफलमा अर्थ मन्त्री रामेश्वर खनाल, गृहमन्त्री ओमप्रकाश अर्याल, कानून, न्याय तथा संसदीय मामिला मन्त्री अनिलकुमार सिन्हा, मुख्यसचिव एकनारायण अर्याललगायत सरकारका उच्च अधिकारी सहभागी थिए। आयोगतर्फबाट आयुक्त डा. जानकी तुलाधर, सगुन शमशेर जबरा र सचिव महादेव पन्थ उपस्थिति रहनुभएको थियो।