काठमाडौँ । मुख्यत विपिको आदर्श र सिद्दान्तमा चलेको पार्टी, नेपाली कांग्रेसका पूर्वउपसभापति गोपालमान श्रेष्ठले लोकतन्त्रमा फरक मतको सम्मान अपरिहार्य हुने बताएका छन् । उनले राजसंस्थासहित सबै पक्षसँग संवाद गरेर हाल देखिएको राजनीतिक समस्या हल गर्नुपर्नेमा जोड दिएका छन् । हिजो आइतबार राजधानी काठमाडौंमा पत्रकार सम्मेलनको आयोजना गर्दै श्रेष्ठले जेन–जी पुस्तादेखि परम्परागत राजनीतिक दलहरूको विचारलाई स्वीकार गर्ने साहस राजनीतिक दलहरूले देखाउनुपर्ने बेला आएको  बताएका छन् ।

उनले जेन—जी आन्दोलनका मागहरूलाई गम्भीरतापूर्वक लिनुपर्ने आवश्यकता औंल्याए। उत्पन्न समस्याको समाधान संवाद, सहकार्य र सहअस्तित्वपूर्ण राजनीतिबाट खोजिनुपर्ने उनको जोड छ। परम्परागत राजनीतिक शक्तिहरूलाई समेत आत्मसात् गर्दै सबै पक्ष, विशेष गरी जेन–जी र राजसंस्था लगायत सँग संवादमार्फत राजनीतिक निकास खोज्न ढिला गर्दा मुलुकमा बाहिरी शक्तिको हस्तक्षेप बढ्ने चेतावनी उनले दिए।

श्रेष्ठले अहिलेको सरकारले लोकतन्त्रको नाममा राजनीतिक दलहरूलाई निषेश गर्ने नीति लिएको भन्दै आपत्ति जनाए। उनले लोकतन्त्रको नाममा एनजीओहरूले राजनीतिक दलहरूलाई विस्थापित गर्ने प्रपञ्च चलिरहेको उल्लेख गर्दै यो कार्य लोकतन्त्र, राष्ट्रियता र स्वाधीनतामाथिको खतरा भएको बताए।

१२ बुँदे सम्झौताको हस्ताक्षरकर्तासमेत रहेका श्रेष्ठले उक्त सम्झौताको माध्यमबाट शान्ति स्थापना र समृद्धिको लक्ष्यमा पुर्‍याउन राजनीतिक दलहरू पूर्ण रूपमा सफल हुन नसकेको टिप्पणी गरे। शान्ति प्रक्रिया सुरु भएको करिब दुई दशकसम्म पनि टुङ्गोमा पुर्‍याउन नसक्दा द्वन्द्वपीडितहरू अहिले पनि न्यायविहीन अवस्थामा भौंतारिरहेको उनले बताए।

अन्तमा, उनले सबै राजनीतिक दलहरूलाई सबै पक्षसँग सहकार्य गरेर समयमै निर्वाचन गराएर मुलुकलाई अगाडि बढाउनेतर्फ सचेत हुन आवश्यक रहेको बताए ।