काठमाडौं । धार्मिक नगरी वराहक्षेत्र चतराधामबाट बृहत्तर वराहक्षेत्र पदयात्रा सुरु भएको छ । जगतगुरु बालसन्त मोहनसरणले बृहत्तर वराहक्षेत्र पदयात्रा २०८० सालबाट सुरु गर्नुभएको थियो । स्थानीय धार्मिक र पौराणिक सम्पदाहरूको प्रचारप्रसार र जगेर्ना गर्ने उद्देश्यले सुरु गरिएको पदयात्रा यस वर्ष पनि कात्तिक १ गतेबाट सुरु भएको हो ।

बृहत्तर वराहक्षेत्रभित्र पर्ने धार्मिक तथा ऐतिहासिक महत्त्वको मठ मन्दिर, तीर्थहरूको प्रवर्धन, प्रचार, उजागर गर्ने उद्देश्यले पदयात्राको सुरु गरिएको जगतगुरु बालसन्त मोहनशरण देवाचार्यले जानकारी दिनुभयो । “इतिहास आफैँ बन्दैन, हामिले नै बनाउनुपर्छ”, भन्दै नेपालराष्ट्रको धार्मिक गरिमा उन्नत गराउन वृहत्तर वराहक्षेत्रको कठीन पैदल यात्रामा निक्लनुभएका नेपाल राष्ट्रका एतिहासिक जगतगुरु श्री मोहन शरण देवाचार्यज्यू भन्नुहुन्छ, “यो परिक्रमा केवल परिक्रमा मात्रै होइन, यो त परिक्रमा मार्गमा रहेका सबै स्थानलाई उजागर गर्ने काम पनि हो, यो धार्मिक जगतमा फरक इतिहास निर्माण गर्ने काम हो । यस पवित्र धार्मिक यात्रामा स्थानीय व्यक्ति तथा संघसंस्थाको उल्लेख्य सहभागीताले हामिलाई थप उर्जा दिनेछ” ।

कुम्भस्थल चतरा धामबाट सुरु भएको यस पदयात्रा पन्ध्रदिनेको हुने बताईएको छ । यस क्रममा धार्मिक सुनसरी, उदयपुर र धनकुटा जिल्लाका धार्मिक क्षेत्रको परिक्रमा गर्ने बताइएको छ । चतराधामबाट सुरु भएको पदयात्राले चतराधाम क्षेत्रबाट सप्तकोसी नदी पार गरी उदयपुरको बेलका नगरपालिका सोमबारेमा अवस्थित महाङ्काल भगवतीको पहिलो दर्शन गरिने जगदगुरु बालसन्त मोहनसरणले बताउनुभयो । उहाँका अनुसार कोसी नदी किनारमा रहेको कोसोप्पा गङ्गाको दर्शन गरिने छ । पदयात्रीले मैनामैनीमा अवस्थित मैनाकुट पर्वत र मैनादेवी भगवतीको दर्शन गरिने बताइएको छ ।

पदयात्राको रुटमा पर्ने त्रिवेणी धाम, सफाइटार कामान्चल पर्वतस्थित शिव पाञ्चायन मन्दिर, मूलघाट विश्रान्ति धाम, बेलहरा, सागुरीगढी, नमस्ते झरना हुँदै कार्की छाप भेडेटार हुँदै पदयात्रा धरान आइपुग्ने जनाइएको छ ।

पदयात्रीले धरानको शिवजट्टाधाम, वसुधाराधाम, बुढासुब्बा, दन्तकाली, पिण्डेश्वर मन्दिर हुँदै तरहराबाट इटहरी हुँदै वृद्ध गङ्गाको तटमा रहेको विश्वरुपेश्वर महादेव मन्दिरको दर्शन गरिने रुट रहेको जगदगुरु बालसन्तले जनाकारी दिनुभएको छ ।

त्यसैगरी, सुनसरीमै रहेको रामपुरा, मानपुर सिङ्घियाको रुट हुँदै रामधुनी मन्दिरको परिक्रमा पश्चात पदयात्रा प्रकाशपुर, राजाबास र सालबनी हुँदै शक्ररुद्र तीर्थ, वराह भगवानको गर्भ गृहको दर्शन गरिने जगदगुरु बालसन्त मोहनसरणले जानकारी दिनुभएको छ । जगतगुरु बालसन्त मोहनसरणले बृहत्तर वराहक्षेत्र पदयात्रा २०८० सालबाट सुरु गर्नुभएको थियो ।