काठमाडौं । इन्किलाब मोन्चोका नेता सरिफ उस्मान बिन हादीको निधनको विरोधमा बङ्गलादेशको राजधानी ढाकामा प्रदर्शन र तनाव निरन्तर बढ्दै गएको छ। पछिल्लो घटनाक्रममा प्रदर्शनकारीहरूले प्रतिष्ठित सञ्चारमाध्यमका कार्यालयहरू र राष्ट्रपिता शेख मुजीबुर रहमानको आंशिक रूपमा ध्वस्त घरलाई लक्षित गरेका छन्।
डेली स्टार र प्रथम आलो जस्ता प्रमुख मिडिया हाउसका कार्यालयहरूमा एक रात हिंसात्मक तोडफोड र आगजनी भएको प्रत्यक्षदर्शीहरूले बताएका छन्। त्यसपछि प्रदर्शनकारीहरू शेख मुजीबुर रहमानको घर पुगेका थिए, जहाँ बाँकी संरचना भत्काउने प्रयास गर्नुका साथै पूर्व प्रधानमन्त्री शेख हसिनाका पोस्टरमा आगो लगाउने प्रयास गरिएको जनाइएको छ।
उस्मान हादीको मृत्यु पश्चात् देशभर अशान्ति फैलिँदै गएपछि इन्किलाब मोन्चोले आम नागरिकलाई संयम अपनाउन अपिल गरेको छ। बिहीबार राति फेसबुकमार्फत सार्वजनिक विज्ञप्तिमा संगठनले हिंसा, आगजनी र तोडफोड नगर्न आग्रह गर्दै केही समूहले बङ्गलादेशलाई अस्थिर बनाउने प्रयास गरिरहेको दाबी गरेको छ। साथै, फेब्रुअरीमा हुन लागेको निर्वाचनको सन्दर्भ उल्लेख गर्दै अशान्तिले कसलाई फाइदा पुर्याउँछ भन्नेबारे गम्भीर रूपमा सोच्न आग्रह गरिएको छ।
यसैबीच, डेली स्टारको कार्यालयमा भएको आक्रमणका क्रममा भवनको छतमा फसेका एक पत्रकारले आफ्नो अनुभव सार्वजनिक गरेका छन्। उनका अनुसार भीडले प्रथम आलोको कार्यालयमा आक्रमण गरेपछि डेली स्टारतर्फ अघि बढ्दै गरेको सूचना पाएपछि कर्मचारीहरूले भवन खाली गर्ने प्रयास गरे। तर, त्यतिन्जेलसम्म भीडले भुइँतलासम्म व्यापक तोडफोड गर्दै आगजनी गरिसकेको थियो।
बाक्लो धुवाँका कारण तल झर्न असम्भव भएपछि पत्रकारहरू १० औँ तलाको छतमा पुगेर ज्यान जोगाउन बाध्य भएका थिए। केही समयपछि फायर सर्भिसको टोली घटनास्थलमा पुगेर आगो नियन्त्रणमा लिएको र छतमा फसेका व्यक्तिहरूलाई सुरक्षित रूपमा उद्धार गरेको बताइएको छ।
घटनाबाट उत्पन्न असुरक्षा र क्षतिको अवस्थाका कारण शुक्रबार प्रथम आलो र द डेली स्टार दुवै पत्रिका प्रकाशित नहुने जनाइएको छ।(हिमालय टाईम्सबाट)
