काठमाडौँ । नेपाल सरकारका पूर्व सचिव तथा सुपरिचित सामाजिक अभियन्ता भीम उपाध्ययले गाँजालाई छिटो बैधता दिनुपर्ने बताएका छन् ।
पूर्व सचिव उपाध्यायले सरकारले नीति तथा कार्यक्रममा गाँजालाई बैध गर्ने कुरा नसमेटेपछि यस्तो प्रतिक्रिया दिएका हुन् । उनले पटक पटक गाँजा बैध हुनुपर्ने माग राख्दै आएका छन् । गाँजा बैध भयो भने देश र जनताको आर्थिक अवस्थामा अभुतपूर्व परिवर्तन हुने उनको तर्क छ ।
उनले गाँजा खाएर एक जनाको पनि मृत्यु नभएको बताएका छन् । उनले विभिन्न उदाहरणहरु दिदै रक्सी, चुरोट खाएर मान्छेहरु मरेका तर गाँजा खाएर नमरेको दाबी गरेका छन् ।
पूर्वसचिव उपाध्यायले नेपाल सरकारले युएनमा गॉजा हानीकारक लागू पदार्थ हैन, औषधीय वनस्पति हो, कानुन बनाएर नियमन गरी उपयोग गर्नुपर्छ भन्ने प्रस्तावमा ३ वर्ष अघि मतदान गरेर पारित गराएको समेत स्मरण गराएका छन् ।
उनले भनेका छन्, “अहिले सम्म कुनै काम गरेन । यस्तो बेरोजगारी र आर्थिक संकट हुदा पनि काम गरेन । यस्तो मुलुकको कहिल्यै भविष्य हुदैन, जो बोल्छ एउटा, गर्छ ठिक उल्टो । नेपालका सरकार नेपालीको हितमा हुने कुनै निर्णय गर्दैन भन्ने आरोपमा सत्यता रहेको यो सटिक प्रमाण हो ।”
उनले बजेट भाषण मार्फत गाँजा बैधको कुरा आउनु पर्ने माग समेत राखेका छन् । पूर्व सचिव सामाजिक संजालमा सक्रिय छन् । उनले सामाजिक संजालबाटै गरिब असक्त र असाहयहरुका आर्थिक सहयोग समेत संकलन गरि उनीहरुको औषधि उपचारका लागि सहज गरिदिएका छन् ।
