हाम्रो जीवनमा घट्ने हरेक घटना तथा परिघटनामा ब्रह्मान्डिय उर्जाको प्रभाव रहेको हुन्छ । सोहि नुसार हाम्रा दैनिक गतिबिधिहरुलाई जोड्न सकेमा जीवन सफल हुन्छ । जीवन नै यात्रा हो, यात्रा गर्दा राम्रो साहित (साईत) मा गरियो भने यात्रा सफल हुन्छ र यात्रा सफल हुनु भनेको जीवन सफल हुनु हो । यहां यात्रालाई दैनिक गतिबिधिको रुपमा ब्रह्मान्डिय उर्जासंग जोडेर चर्चा गरिएको छ । कुन वार कुन दिशा यात्रा गर्दा राम्रो हुन्छ, पं. शिखरनाथले शिखरनाथ भाष्यमा उल्लेख गर्नुभएको महत्वपुर्ण जानकारीहरु यस्ता छन् ।
आईतवार यात्रा गर्दा धन नाश र झगडा हुन्छ, सोमवार यात्रा गर्दा सरसामान मिल्नुका साथै साथीभाईसंग रमाईलो भेटघाट हुन्छ ।
मंगलवार यात्रा गर्नु हुन्न, गरेमा अग्नी र चोरको डर हुन्छ ।
बुधवार, बिहिवार र शुक्रवार यात्रा गर्दा राम्रो मानिन्छ । बुधवार यात्रा गर्दा द्रब्य सुख मिल्छ भने, बिहिवारको यात्राले सधैलाई सुख मिल्छ साथै शुक्रवारको साहित सबैभन्दा राम्रो मानिन्छ ।
शनिवारको यात्रा नराम्रो मानिएको छ, शनिवार यात्रा गर्दा रोगब्याधीको भय मात्रै हैन, निक्कै ठुलो झमेला पर्ने र मृत्यु सम्मको डर छ भनिएको छ ।
वारहरुमा सोमवार, शनिबार र बुधवार साथै नक्षत्रहरुमा जेष्ठा,श्रवण र मूल तथा तिथिहरुमा प्रतिपदा तथा नवमी तिथीमा पूर्व साईत नगर्नु राम्रो हुन्छ ।
वारमा बिहीवार नक्षत्रहरुमा पूर्वभाद्रपदा, अश्विनी र धनिष्ठा साथै तिथिहरुमा पञ्चमी तथा त्रयोदशी तिथीमा दक्षिण दिशामा नजानु राम्रो मानिन्छ ।
वारहरुमा आईतवार र विहीवार, नक्षत्रहरुमा रोहिणी र पुष्य नक्षत्र र तिथिहरुमा चतुर्दशी र षष्ठी तिथीमा पश्चिम यात्रा नगर्नु राम्रो मानिन्छ ।
वारहरुमा मंगलवार र बुधवार तथा नक्षत्रहरुमा हस्ता र उत्तरफाल्गुणी नक्षत्रमा र तिथिहरुमा दशमी र द्वितीया तिथिमा उत्तर दिशामा यात्रा नगर्नु राम्रो मानिन्छ ।
शनिवार र बुधवार इशान (उत्तर पूर्व) दिशा, सोमवार बिहीबार आग्नेय (दक्षिण पूर्व) मङ्गलवार वायव्य (दक्षिण पश्चिम) र आईतवार र शुक्रबार नैऋत्य (उत्तर पश्चिम) दिशामा यात्रा नगर्नु राम्रो मानिन्छ ।
