एपीएफको अपराजित यात्रा

काठमाडौं । प्रधानमन्त्री कप महिला राष्ट्रिय क्रिकेट प्रतियोगितामा एपीएफले अपराजित यात्रा कायम राखेको छ । बुधबार मूलपानीस्थित मूलपानी क्रिकेट मैदानमा भएको खेलमा एपीएफले कर्णाली प्रदेशविरुद्ध ९२ रनको सहज जित निकालेको हो । एपीएफले प्रस्तुत गरेको १६१ रनको लक्ष्य पछ्याउने क्रममा कर्णालीले निर्धारित २० ओभरमा आठ विकेट गुमाएर ६८ रनमात्र बनाउन सक्यो । कर्णालीकी त्रिशणा विश्वकर्माले १९ रन बनाइन् । गौरी बोहराले १२ र रश्मी खड्काले १० रन बनाउनुबाहेक अन्यले दोहोरो अंकमा रन जोड्न सकेनन् ।

एपीएफकी करुणा भण्डारीले चार विकेट लिइन् । चार ओभर बलिङ गरेकी करुणाले एक मेडन राख्दै १३ रन खर्चिइन् । सुमन बिष्टले दुई विकेट लिँदा विनु बुढा र सीता रानामगरले समान एक विकेट लिए । त्यसअघि टस जितेर ब्याटिङमा आएको एपीएफले निर्धारित २० ओभरमा दुई विकेट गुमाएर १६० रनको योगफल खडा गरेको थियो । एपीएफकी दुवै ओपनरले अर्धशतकीय इनिङ खेले । राजमती ऐरीले ६७ रन बनाइन् । उनले ५५ बलमा नौ चौका र दुई छक्का प्रहार गरिन् । मम्ता चौधरीले ५५ बलमा आठ चौकासहित ६२ रन थपिन् । रोमा थापा १४ रनमा अविजित रहिन् ।

कर्णालीकी त्रिसणा विश्वकर्माले एक विकेट लिइन् । जितसँगै पाँच खेलबाट १० अंक जोडेको एपीएफ तालिकाको शीर्ष स्थानमा छ । समान खेल खेल्दा पनि अंकविहीन कर्णाली तालिकाको पुछारमा छ । प्रतियोगितामा कर्णाली हालसम्म जितविहीन छ । प्रतियोगिताअन्तर्गत आजै भएका अन्य खेलमा वाग्मतीले लुम्बिनी प्रदेशविरुद्ध नौ रनको, सुदूरपश्चिम प्रदेशले मधेस प्रदेशविरुद्ध पाँच विकेटको र कोसी प्रदेशले गण्डकी प्रदेशविरुद्ध ५५ रनको जित दर्ता गराएका छन् ।