काठमाडौं । जर्मनी युरो २०२४ को क्वाटरफाइनलबाटै बाहिरिएपछि स्ट्राइकर थोमस मुलरले अन्तर्राष्ट्रिय फुटबलबाट सन्न्यास लिनुभएको छ । ‘राष्ट्रिय टोलीका १३१ खेल र ४५ गोलपछि म बिदाइ लिँदैछु,’ मुलरले भिडियो वक्तव्यमा भन्नुभएको छ । यस्तै फ्रान्सका सर्वकालिक गोलकर्ता ओलिभर जिरुडले अन्तर्राष्ट्रिय फुटबलबाट सन्न्यास लिनुभएको छ । १३७ खेलमा ५७ गोल गर्नुभएका उहाँले सोमबार सन्न्यास लिनुभएको हो ।

सेप्टेम्बरमा ३५ वर्ष पुग्नुभएका मुलर सन् २०१४ को विश्वकप जित्ने जर्मन टोलीका प्रमुख सदस्य हुनुहुन्थ्यो । सेमिफाइनलमा आयोजक ब्राजिलमाथि जर्मनीको ७-१ को अविष्मरणीय जितमा पनि उहाँले पहिलो गोल गर्नुभएको थियो । ‘जब मैले १४ वर्षअघि जर्मन राष्ट्रिय टोलीका लागि पहिलो अन्तर्राष्ट्रिय खेल खेलेको थिएँ, मैले यो सपनामा पनि सोचेको थिइनँ,’ मुलरले भन्नुभएको छ, ‘देशका लागि खेल्न पाउँदा मलाई सधैँ गर्व लाग्छ । हामीले सँगै उत्सव मनायौँ र कहिलेकाहीँ सँगै आँसु झार्यौं ।’

युरो २०२४ बाट जर्मनी बाहिरिएपछि मुलरले सन्न्यासको संकेत गर्नुभएको थियो । सन् २०१४ को विश्वकप विजेता जर्मनीको राष्ट्रिय टोलीमा अब गोलकिपर म्यानुअल नुयर एकमात्र खेलाडी रहनुहुनेछ । जर्मनी र रियल म्याड्रिडका मिडफिल्डर टोनी क्रुसले युरोअघि नै फुटबलबाट सन्न्यास लिने घोषणा गर्नुभएको थियो । मुलरले आफ्नो क्लब बायर्न म्युनिखका लागि खेल्न जारी राख्नुहुनेछ । बायर्नसँग उहाँको २०२५ सम्म सम्झौता छ ।

फ्रान्सका सर्वकालिक गोलकर्ता जिरुडद्वारा सन्न्यास

फ्रान्सका सर्वकालिक गोलकर्ता ओलिभर जिरुडले अन्तर्राष्ट्रिय फुटबलबाट सन्न्यास लिनुभएको छ । १३७ खेलमा ५७ गोल गर्नुभएका उहाँले सोमबार सन्न्यास लिनुभएको हो ।

जिरुडले इन्स्टाग्राममा लेख्नुभएको छ, ‘फ्रान्सेली राष्ट्रिय टोलीबाट बिदाइ लिने क्षण निकै डरलाग्दो छ । मैले १३ वर्षसम्म फ्रान्सको टिमको सेवा गरेको छु, त्यो मेरो हृदयमा सधैँ कुँदिरहनेछ । यो मेरो सबैभन्दा ठूलो गर्व र मेरो सबैभन्दा प्रिय स्मृति हो ।’

आफ्नो अन्तर्राष्ट्रिय करियरको दौडान ३७ वर्षीय जिरुडले रुस विश्वकप २०१८ जित्नुभयोे र युरोकप उपविजेता पनि बन्नुभयो । उहाँले कतारमा सन् २०२२ को विश्वकप फाइनलमा थियरी हेनरीको ५१ गोलको राष्ट्रिय कीर्तिमान तोड्नुभएको थियो । जिरुडले सन् २०११ मा डेब्यु गर्नुभएको थियो र जर्मनीविरुद्ध २-१ को मैत्रीपूर्ण जितमा पहिलो गोल गर्नुभएको थियो ।

उहाँले गत मे महिनामा युरोकप आफ्नो अन्तिम ठूलो अन्तर्राष्ट्रिय प्रतियोगिता हुने बताउनुभएको थियो । आर्सनल, चेल्सी र एसी मिलानका पूर्वस्ट्राइकर अर्को सिजन मेजर लिग सकर क्लब लस एन्जलस एफसीमा सामेल हुनुहुनेछ । एजेन्सी ।