काठमाडौं । लक्ष्मी इन्टरकन्टिनेन्टलले नेपाल ल्याएको फेसलिफ्ट क्रेटा काठमाडौं आईपुगेको छ । नेपाली सडकमा सर्वाधिक गुड्ने एसयूभी क्रेटाको फेसलिफ्ट मोडल नेपाल आएको हो ।

भारतीय बजारमा निरन्तर सफलता पाइरहेको नयाँ क्रेटा नेपाली बजारमा कस्तो ब्यापार गर्छ, त्यो हेर्न भने केही समय कुर्नु पर्ने हुन्छ । तर, जसरी अगाडिको लुक्स, पछाडिको डिजाइन र इन्टेरियरमा आधुनिक ट्रेन्ड समातेर बनाइएको छ, त्यसले धेरैको मन जित्ने देखियो ।

नेपालमा पेट्रोल कारको माग क्रमिक रुपमा घट्दै गइरहेको समयमा आएको क्रेटामा पहिलो पटक एडास फिचर समाबेश गरिएको छ । स्टायन्डर्ड रुपमै ६ एयरब्यागको साथ आएको क्रेटाको सुरुवाती भेरियन्टको मूल्य ५५ लाख ९६ हजार तोकिएको छ ।

नयाँ क्रेटाको अगाडि फेसिया र पछाडिको भागमा ब्यापक परिमार्जन भएको छ । अगाडि एल आकारको एलइडी डे टाइम रनिङ लाइट र नयाँ हेडल्याम्पको प्रयोग उत्कृष्ट देखिन्छ । विल्कुलै नयाँ र पृथक रियर लाइटमा यसलाई आकर्षक देख्न सकिन्छ ।

पहिलो पटक क्रेटामा उपलब्ध एडास फिचर भित्र लेन किप एण्ड फलोइङ असिस्ट, लेन डिपार्चर वार्निङ, एडाप्टिभ क्रुज कन्ट्रोल, फ्रन्ट कोलिसन एभाइडेन्स, ब्लाइन्ड स्पट भ्यू मनिटर र ड्राइभर अटेन्सन वार्निङ जस्ता चालकलाई सहज बनाउने फिचर छन् ।

यसको ड्यासबोर्ड पूर्णत नयाँ छ भने इन्फोटेनमेन्ट सिस्टम र डिजिटल इन्स्ट्रुमेन्ट क्लस्टर पहिलेकोभन्दा निकै आकर्षक छ । यसमा दुबै स्कृन समान १०.२५ इन्चका छन् ।(मेरो अटो)