काठमाडौं । एप्पलले सेप्टेम्बर महिनामा आईफोन १६ लाईनअप सार्वजनिक गर्दैछ। यसै क्रममा आईफोन १६ प्रो र आईफोन १६ प्रो म्याक्सको सही ब्याट्री क्षमताहरूको दावी गर्दै चीनबाट एउटा नयाँ रुमर बाहिरिएको छ।
आईफोन १६ प्रो ३,५७७ एमएएच ब्याट्रीसहित आउने भनिएको छ र जुन आईफोन १५ प्रो को ३,२७४ एमएएच भन्दा ९ प्रतिशत ठूलो हुनेछ।
जीएसएमएरिनाका अनुसार आईफोन १६ प्रो म्याक्सको ब्याट्री ४,६७६ एमएएच हुने आकलन छ जुन आईफोन १५ प्रो म्याक्समा रहेको ४,४४१ एमएएच बब्याट्रीको तुलनामा ५ प्रतिशत भन्दा बढी भएको जनाइएको छ।
यी वृद्धिहरू उल्लेखनीय रुपमा ठूलो नभए पनि एप्पलले यस सन्दर्भमा निरन्तर सुधार गरिरहेको देखिएको समाचारमा उल्लेख छ। भौतिक क्षमतामा भएका यी साना वृद्धिहरूले चिपसेट र डिस्प्ले प्यानलमा ल्याउने प्रभावकारितालाई जोडेर हेर्ने हो भने आगामी आईफोन मोडेलहरूमा सुधार ल्याउन सक्ने जनाइएको छ।
यसबाहेक आईफोन १६ प्रो र आईफोन १६ प्रो म्याक्स दुवै ४०डब्ल्यु वार्यड (तारयुक्त) र २०डब्ल्यु म्यागसेफ (ताररहित) वायरलेस चार्जिङ सहित आउने सम्भावना रहेको जीएसएमएरिनाले जनाएको छ।
साथै यसको यो चार्जिङ क्षमता आईफोन १५ प्रो र प्रो म्याक्सको भन्दा बढेको पाइएको छ। आईफोन १५ प्रो र प्रो म्याक्समा क्रमशः २७डब्ल्यु र १५डब्ल्युको सुविधा थियो ।(टेक्नोलोजी खबर)
