काठमाडौं । अन्तर्राष्ट्रिय टी-२० शृंखलाको चौथो खेलमा घरेलु टोली वेष्ट इण्डिजले इंग्ल्याण्डलाई हराएको छ । आइतबार बिहान सम्पन्न खेलमा वेष्ट इण्डिजले इंग्ल्याण्डलाई पाँच विकेटले हराएको हो । जितसँगै पाँच खेलको शृंखलामा वेष्ट इण्डिज ३-१ को स्थितिमा पुगेको छ । यसअघि इंग्ल्याण्ड आठ, सात र तीन विकेटले विजयी भएको थियो ।

डारेन सामी नेसनल क्रिकेट मैदानमा इंग्ल्याण्डले प्रस्तुत गरेको २१९ रनको लक्ष्य वेष्ट इण्डिजले १९ ओभरमा पाँच विकेट गुमाउँदै पूरा गर्न सफल भयो । वेष्ट इण्डिजका लागि इभन लइसले ३१ बलमा सात छक्का र चार चौकाको मद्दतले सर्वाधिक ६८ रनको योगदान गर्नुभयो । यसैगरी साइ होपले २४ बलमा सात चौका र तीन छक्काको मद्दतले ५४, कप्तान रोभमन पावेलले ३८ र शेर्फन रादरफोर्डले अविजित २९ रन बनाउनुभयो । पहिलो विकेटका लागि लुइस र होपले १३६ रनको साझेदारी गर्नुभएको थियो । इंग्ल्याण्डका लागि रेहान अहमदले तीन र जोन टर्नरले एक विकेट लिनुभयो ।

त्यसअघि टस हारेर ब्याटिङको निम्तो पाएको इंग्ल्याण्डले निर्धारित २० ओभरमा पाँच विकेट गुमाउँदै २१८ रनको योगफल तयार पारेको थियो । इंग्ल्याण्डका लागि जाकोब बेटहिलले ३२ बलमा पाँच छक्का र चार चौकाको मद्दतले अविजित ६८ रनको योगदान गर्नुभयो । यसैगरी फिल साल्टले ३५ बलमा पाँच चौका र चार छक्काको मद्दतले ५५, कप्तान जोस बटलरले ३८, ज्याक विलले २५ र साम करनले २४ रन बनाउनुभयो । पाँचौँ विकेटका लागि बेटहिल र करनले ६३ तथा पहिलो विकेटका लागि साल्ट र विलले ५३ रनको साझेदारी गर्नुभएको थियो । वेष्ट इण्डिजका लागि गुडाकेश मोतीले दुई तथा अल्जारी जोसेफ र रोस्टन चेजले समान एक विकेट लिनुभयो । शृंखलाको पाँचौँ तथा अन्तिम खेल सोमबार हुनेछ । (एजेन्सी)