काठमाडौं । युइएफए नेसन्स लिग फुटबलमा स्पेनले स्विट्जरल्याण्डविरुद्ध ३-२ को रोमाञ्चक जित दर्ता गरेको छ । सोमबार राती हेलियोडोरो रोड्रिग्वेज लोपेज रंगशालामा घरेलु टोली स्पेनलाई जित दिलाउन यारिमी पिनो, ब्रायन गिल र ब्रायन जारागोजाले गोल गर्नुभयो । स्विट्जरल्याण्डका लागि जोयल मोन्टिरो र एन्डी जेकिरीले गोल फर्काउनुभयो ।

खेलको ३२औँ मिनेटमा पिनोको गोलमार्फत् स्पेनले अग्रता लिएको थियो । ६३औँ मिनेटमा मोन्टिरोले खेललाई बराबरीमा ल्याउनुभयो । गिलले ६८औँ मिनेटमा गोल गर्दा स्पेन २-१ ले अगाडि बढ्यो । निर्धारित समय सकिन पाँच मिनेट बाँकी रहँदा जेकिरीले गोल गर्दै स्विट्जरल्याण्डलाई २-२ को बराबरीमा ल्याउनुभयो । इन्जुरी समयमा जारागोजाले पेनाल्टीमार्फत् नै गोल गर्दै स्पेनलाई ३-२ को रोमाञ्चक जित दिलाउनुभयो ।

जितसँगै ६ खेलमा १६ अंक जोडेर लिग ‘ए’ समूह-४ को शीर्ष स्थानमा रहेको स्पेन अर्को चरणमा प्रवेश गरेको छ । पराजित स्विट्जरल्याण्ड समान खेलबाट दुई अंकका साथ पुछारमा रहेर लिग ‘बी’ मा झरेको छ ।

यसैगरी लिगकै अर्को खेलमा अग्रता जोगाउन नसक्दा पोर्चुगल घरेलु टोली क्रोएसियासँग १-१ को बराबरीमा रोकिएको छ । पोल्जुड रंगशालामा पोर्चुगलका लागि जोआओ फेलिक्स र क्रोएसियाका लागि जेस्को जिभार्डिओलले गोल गर्नुभयो । खेलको ३३औँ मिनेटमा फेलिक्सको गोलमार्फत् पोर्चुगलले अग्रता लिएको थियो । जिभार्डिओलले ६५औँ मिनेटमा गोल गर्दै खेललाई बराबरीमा ल्याउनुभयो । उहाँले क्रिस्टिजन जाकिकको पासलाई सदुपयोग गर्नुभएको थियो । त्यसपछि थप गोल निस्कन नसक्दा दुवै टोली अंक बाँड्न बाध्य बने । यो नतिजासँगै ६ खेलमा १४ अंक जोडेर लिग ‘ए’ समूह-१ को शीर्ष स्थानमा रहेको पोर्चुगल क्वाटरफाइनलमा प्रवेश गरेको छ । समान खेलबाट आठ अंकका साथ दोस्रो स्थानमा रहेको क्रोएसियाले पनि क्वाटरफाइनलको यात्रा तय गरेको छ । यही समूहको अर्को खेलमा स्कटल्याण्डले पोल्याण्डविरुद्ध २–१ को रोमाञ्चक जित दर्ता ग¥यो । डेनमार्क र सर्बिया गोलरहित बराबरीमा रोकिए । (एजेन्सी)