काठमाडौं । फ्रेन्च लिग वान फुटबलमा लिल विजयी भएको छ । शुक्रबार राती भएको खेलमा लिलले नाइसविरुद्ध २-१ गोलको पुनरागमन जित दर्ता गरेको हो । खेलको पहिलो हाफमा नाइसले सोफियान डियोपको गोलबाट अग्रता लिएको थियो । २९औँ मिनेटमा डियोपले बक्सभित्रको उत्कृष्ट फिनिसिङमार्फत् नाइसलाई १-० को अग्रता दिलाउनुभएको थियो । दोस्रो हाफको सुरुमै लिलले खेललाई बराबरीमा ल्यायो ।
४८औँ मिनेटमा हाकोन अरनार हराल्डसनले जोनाथन डेविडको पासमा बायाँबाट उत्कृष्ट प्रहार गर्दै गोल गर्नुभएको थियो । ६३औँ मिनेटमा बाफोडे डियाकिटेले निर्णायक गोल गर्नुभयो । डियाकिटेले उत्कृष्ट फिनिसिङ गर्दै लिललाई २-१ को अग्रता दिलाउनुभयो । जितसँगै लिलले लिग वानमा १८ खेलपछि ३२ अंक पुर्याएको छ ।
यस्तै, लिगकै अर्को खेलमा तालिकाको पुच्छारमा रहेको मोन्टपिलरले चौथो स्थानमा रहेको मोनाकोलाई पराजित गरेको छ । घरेलु मैदानमा मोन्टपिलरले १ गोलले पछि परेको अवस्था उल्ट्याउँदै २-१ को जित दर्ता गरेको हो । मोन्टपिलरको जितमा जोर्डनका खेलाडी मुसा अल-तामारीले दोस्रो हाफमा दुई गोल गर्नुभयो । खेलको सुरुवाती चरणमा पाहुना टोली मोनाकोले निकै प्रभावशाली प्रदर्शन गरेको थियो । बेन्जामिन लेकन्टले इल्येस बेन सेघिरका दुई उत्कृष्ट प्रयासहरू रोक्दै मोन्टपिलरलाई खेलमा टिकाउनुभएको थियो ।
तर, ३१औँ मिनेटमा लामिन केमारले दिएको कर्नर बलमा जर्मन डिफेन्डर थिलो केररले हेडर गोलमार्फत् मोनाकोलाई अग्रता दिलाउनुभयो । पहिलो हाफमा एक गोलले अघि रहेको मोनाकोविरुद्ध दोस्रो हाफमा मोन्टपिलरका मुसा अल-तामारीले उत्कृष्ट प्रदर्शनले खेलको नतिजा आफ्नो पक्षमा पार्नुभयो । काउन्टर अट्याकबाट ५४औँ मिनेटमा पहिलो गोल गर्नुभयो । त्यसपछि खेलको ८२औँ मिनेटमा अर्को गोल गर्दै आफ्नो टोलीलाई अग्रता दिलाउनुभयो ।
