काठमाडौं । म्यानचेस्टर युनाइटेडका मुख्य प्रशिक्षक रुबेन अमोरिमले आफूहरू इतिहासमा सबैभन्दा खराब अवस्थामा रहेको स्वीकार गर्नुभएको छ । इंग्लिस प्रिमियर लिगअन्तर्गत आइतबार राती भएको खेलमा युनाइटेड ब्राइटनसँग ३-१ गोलअन्तरले पराजित भएपछि उहाँले कटु यथार्थ स्वीकार गर्दै भन्नुभयो, ‘हामीले खराब नतिजालाई स्वीकार गर्नुपर्छ र परिवर्तन गर्नुपर्छ ।’
२० पटकको इंग्लिस च्याम्पियन युनाइटेड अहिले २६ अंक जोड्दै तालिकामा १३औँ स्थानमा र रेलिगेसन जोननजिक छ । गत नोभेम्बरमा पूर्वप्रशिक्षक एरिक टेन हागको स्थानमा नियुक्त भएयता अमोरिमको प्रशिक्षणमा युनाइटेडले १५ खेल खेलेको छ । तीमध्ये सात खेलमा हार बेहोरेको छ ।
युनाइटेडको सन् १८९३-९४ यताकै सबैभन्दा खराब प्रदर्शन हो । ‘हामीसँग घरेलु मैदान र प्रिमियर लिगमा धेरै खेल हारेको जस्ता सबै खराब रेकर्डहरू छन्,’ अमोरिमले भन्नुभयो, ‘त्यसैले हामी वास्तवमै कमजोर प्रदर्शन गरिरहेका छौं र हामीले खेल जित्न आवश्यक छ, यतिमात्र हो ।’
अनफिल्ड प्रदर्शन निरन्तर निराशाजनक छ । एफए कपमा आर्सनलविरुद्ध पेनाल्टी सुटआउटमा जित हासिल गर्नुबाहेक युनाइटेडले सबै प्रतियोगितामा पछिल्ला आठमध्ये एक खेलमा मात्र जित हात पारेको छ । ‘कल्पना गर्नुहोस् युनाइटेड समर्थकका लागि यो के हो । कल्पना गर्नुहोस् मेरा लागि यो के हो ?,’ अमोरिमले भन्नुभयो, ‘त्यसैले हामीले नयाँ-नयाँ प्रशिक्षक पाइरहेका छौं । यो परिवर्तनले पनि अझै धेरै खेलमा हार बेहोरिरहनुपरेको छ । जेसुकै नतिजा आए पनि म आफ्नो रणनीति परिवर्तन गर्दिनँ । यही रणनीतिमा खेलिरहे हामी एक दिन सफल हुन सक्छौं भन्ने मलाई विश्वास छ । तर, हामीले यो खराब क्षणलाई पार गर्न आवश्यक छ । किनभने म भर्खरैको परिस्थितिमा त्यति ख्याल गर्दिनँ ।’ (एजेन्सी)
