काठमाडौं । युरोपेली च्याम्पियन्स लिगअन्तर्गत बुधबार बिहान भएको खेलमा स्पेनिस क्लब बार्सिलोनाले सानदार पुनरागमन गरेको छ । बेन्फिकाको मैदानमा लगातार पछि परेको अवस्थाबाट बार्सिलोनाले ५-४ को पुनरागमन जित दर्ता गरेको हो । ९ गोल भएको खेलमा बार्सिलोनाले बेन्फिकालाई ५-४ ले पराजित गर्यो । बार्सिलोनाले रोमाञ्चक कमब्याक गर्दै तीन अंक जोडेको छ ।
बार्सिलोनाको जितमा रोबार्टो लेवान्डोस्की र राफिन्हाले समान दुई गोल गर्नुभयो । एरिक ग्रासियाले एक गोल थप्नुभयो । यसअघि घरेलु टोली बेन्फिकाका लागि ग्रिसका भान्गेलिस पाभ्लिदिसले हृयाट्रिक गर्नुभएको थियो । बार्सिलोनाका रोनाल्डो अरौजोले आत्मघाती गोल गर्नुभयो ।
खेलको पहिलो गोल दोस्रो मिनेटमा गर्दै घरेलु टोलीले बार्सिलोनालाई दबाबमा राखेको थियो । पहिलो हाफमा घरेलु टोली ३-१ ले अघि थियो । ६८औँ मिनेटसम्म ४-२ ले पछि परेको बार्सिलोनाले खेलमा उत्कृष्ट कमब्याक जित निकालेको हो । जितपछि बार्सिलोना च्याम्पियन्स लिगको दोस्रो स्थानमा उक्लिएको छ । सातमध्ये पाँच खेल जितेको बार्सिलोनाको १६ अंक छ । शीर्ष स्थानको लिभरपुलको २१ अंक छ । ११ अंकसहित बेन्फिका १६औँ स्थानमा छ । अन्य खेलहरूमा भने स्लोभन ब्राटिसलाभाले स्टुटगार्टसँग ३-१ को हार बेहोरेको छ । यसैगरी, पिएसभीले क्रेभाना ज्वेदालाई ३-२ ले हराएको छ ।
यता, लिभरपुलले भने लिगमा तीन अंकको अग्रता कायम राखेको छ । मंगलबार राती भएको खेलमा इङ्लिस क्लब लिभरपुलले फ्रेन्च टोली लिललाई २-१ ले हराउँदै लिभरपुलले ३ अंकको अग्रता कायम राखेको हो । एनफिल्डमा भएको खेलमा लिभरपुललाई जिताउन मोहम्मद सलाह र हार्भे एलिओटले समान एक गोल गर्नुभयो । १० खेलाडीमा सीमित लिलका लागि जोनाथन डेविडले एक गोल फर्काउनुभयो । जितपछि सात खेलमा शीर्ष स्थानको लिभरपुलको २१ अंक छ ।
अर्को स्पेनी क्लब एट्लेटिको मड्रिडले बेयर लेभरकुजेनमाथि २-१ को पुनरागमन जित हात पार्यो । ९०औँ मिनेटमा जुलियन आल्भारेजले गोल गर्दै टोलीलाई जित दिलाउनुभयो । पाब्लो बारियोसले २३औँ मिनेटमा रातो कार्ड पाएपछि एट्लेटिको १० खेलाडीमा समेटिएको थियो । लेभरकुजेनका लागि पिएरो हिन्कापिएले हेडरबाट गोल गरेपछि पहिलो हाफमा एट्लेटिको १-० ले पछि परेको थियो । आल्भारेजले ५२औँ मिनेटमा गोल गर्दै खेलको लय परिवर्तन गर्नुभयो र हिन्कापिएले दोस्रो पहेँलो कार्ड पाएर बाहिरिएपछि फेरि अर्को गोल गर्दै एट्लेटिकोलाई तेस्रो स्थानमा पुर्याउनुभएको हो । एट्लेटिकोले सात खेलबाट १५ अंक पुर्याएको छ । समान खेल खेलेको लेभरकुजेन १३ अंकसहित छैटौं स्थानमा छ । (एजेन्सी)
