काठमाडौं । पहिलो खेलमा नेपाल नेदरल्याण्ड्ससँग पराजित भएको छ । महिला त्रिकोणात्मक अन्तर्राष्ट्रिय ट्वान्टी-२० शृंखलाको पहिलो खेलमा नेपाल २० रनले पराजित भएको हो । कीर्तिपुरस्थित त्रिवि क्रिकेट मैदानमा सम्पन्न खेलमा नेदरल्याण्ड्सले नेपालविरुद्ध २० रनको जित हासिल गरेको हो ।

नेदरल्याण्ड्सले प्रस्तुत गरेको १५८ रनको लक्ष्य पछ्याएको नेपालले २० ओभरको समाप्तिमा चार विकेट गुमाएर १३७ रनमात्र जोड्न सफल भएको थियो । नेपालका लागि ओपनर सीता रानामगरले ४५ बलमा तीन चौकासहित सर्वाधिक २८ रन बनाउनुभयो भने सविता जोशीले १७ बलमा एक चौका र दुई छक्कासहित २७ रन जोड्दा पूजा महतोले १४ बलमा समान दुई चौका र छक्कासहित २४ रन बनाउनुभयो । अन्य खेलाडीले भने दोहोरो अंकको रन बनाउन सकेनन् । उता, नेदरल्याण्डका लागि क्यारोलिन दी लेन्ज र इभा लिन्चले समान दुई विकेट, आइरिस ज्विलिङ र फ्रेडेरिक ओभरडिकले समान एक विकेट लिनुभएको थियो । यो जितसँगै नेदरल्याण्ड्सले अंकतालिकामा दुई अंक जोडेको छ ।

सिरिजमा नेपाल, नेदरल्याण्ड्स र थाइल्याण्ड सम्मिलित छन् । नेपालले दोस्रो खेल माघ १९ गते थाइल्याण्डसँग खेल्नेछ । सिरिजमा एक टोलीले ६ खेल खेल्नेछ । नेपालले नेदरल्याण्ड्स र थाइल्याण्डसँग तीन-तीन खेल खेल्नेछ । नेदरल्याण्ड्स र थाइल्याण्डले पनि एक आपसमा तीन खेल खेल्नेछन् । यी खेल सकिएपछि अंकतालिकाको शीर्ष स्थानमा रहने टोलीले सिरिजको उपाधि जित्नेछ ।