काठमाडौं । नेपालका सन्तोष राईले अमेरिकामा भएको हिराल्डो काई अन्तर्राष्ट्रिय कराँते च्याम्पियनसिपमा रजत पदक जित्नुभएको छ । अमेरिकाको न्युयोर्कस्थित कोरोनामा सम्पन्न च्याम्पियनसिपमा सन्तोषले सिनियर एकल कातातर्पm रजत पदक जित्नुभएको हो ।
यस वर्ष उहाँको यो पहिलो पदक पनि हो । गत वर्ष पनि सन्तोषले इंग्ल्याण्डमा सम्पन्न इंग्ल्याण्ड कराँते फेडेरेसन ओपन कराँते सिरिजमा रजत जित्नुभएको थियो ।
यस वर्षको सुरुवातमा पनि सन्तोषले आफ्नो पहिलो अन्तर्राष्ट्रिय च्याम्पियनसिपमा पनि पदक जित्नुभयो । इलंगोर सेन्टरमा सम्पन्न च्याम्पियनसिपमा सन्तोषले कातामा यो सफलता पाउनुभएको हो । फाइनलमा अमेरिकाका कर्नाडोसँग पराजित भएपछि सन्तोष यसपल्ट पनि रजक पदकमा नै सीमित हुनुभयो ।
सन्तोषले यस वर्ष सहभागी भएको पहिलो अन्तर्राष्ट्रिय च्याम्पियनसिपमै पदक जित्न पाउँदा उत्साहित रहेको र यो सफलतालाई निरन्तरता दिने प्रयास गर्ने बताउनुभएको छ । ‘गत वर्ष एउटामात्र अन्तर्राष्ट्रिय च्याम्पियनसिपमा पदक जितेको थिएँ । यस वर्ष पनि पहिलो सहभागितामा नै पदक जित्दा धेरै उत्साहित छु,’ पदक जितेपछि सन्तोषले भन्नुभयो । त्यसअघि भने उहाँले सेमिफाइनलमा बेल्घिमी करिमलाई हराउँदै फाइनलमा स्थान बनाएको प्रशिक्षक सुनिल लामाले जानकारी दिनुभयो । क्वाटरफाइनलमा पनि सन्तोषले पाब्लिनिया गेरोमीलाई हराउनुभएको थियो । यसै च्याम्पियनसिपमा उहाँ फाइटतर्फ भने सेमिफाइनलमा पराजित हुनुभएको थियो ।
उहाँले लास भेगासमा सम्पन्न युएस ओपनमा पनि प्रतिस्पर्धा गर्नुभएको थियो । त्यहाँ उहाँ क्वाटरफाइनलमा इजिप्टका खेलाडीसँग चार-चार अंक भए पनि सेन्सुका आधारमा पराजित हुनुभएको थियो । सन्तोष इचंगु डोजाका प्रमुख हुनुहुन्छ । उहाँको डोजोले शेरबहादुर राष्ट्रिय कराँते प्रतियोगितामा समान दुई स्वर्ण र रजत जितेको थियो । यो च्याम्पियनसिपमा उहाँकै खेलाडी साइमन श्रेष्ठ उदीयमान खेलाडीसमेत हुनुभएको थियो ।
