काठमाडौं । संयुक्त राज्य अमेरिकाले युक्रेनसँग प्राकृतिक स्रोत सम्झौतामा हस्ताक्षर गरेको घोषणा गरेको छ । अमेरिकी अर्थ विभागले जारी गरेको प्रेस विज्ञप्ति अनुसार दुवै देशले ‘पुनर्निर्माण लगानी कोष’ सिर्जना गर्न सहमत भएका हुन् । अमेरिकी राष्ट्रपति डोनाल्ड ट्रम्पले यो सम्झौताले ‘अमेरिकालाई बढी फाइदा’ पुर्याउने बताउनुभएको छ । ‘बाइडेनले युक्रेनलाई ३५० अर्ब डलर दिए । अब हामीले एउटा सम्झौता गरेका छौं जसले हामीलाई त्योभन्दा बढी पैसा दिनेछ’, उहाँले भन्नुभएको छ ।
यसअघि बुधबार अमेरिकी अर्थमन्त्री स्कट बेसान्ट र युक्रेनका उपप्रधानमन्त्री युलिया स्विरिडेन्कोले सम्झौतामा हस्ताक्षर गर्नुभएको थियो । अमेरिकी ट्रेजरी विभागले जारी गरेको विज्ञप्ति अनुसार, सम्झौता अन्तर्गत दुई देशहरूले ‘पारस्परिक सम्पत्ति, प्रतिभा र क्षमताहरू’ले किभको पुनप्र्राप्तिलाई गति दिनसक्छ भनी सुनिश्चित गर्न सहकार्य गर्नेछन् । युक्रेनको दुर्लभ खनिज पदार्थमा अमेरिकी पहुँच सुनिश्चित गर्न किभ र वासिंटनले महिनौंदेखि सम्झौताको लागि वार्ता गरिरहेका छन् ।
