काठमाडौं । पोर्चुगिज स्टार खेलाडी क्रिस्टियानो रोनाल्डोले साउदी प्रो लिगमा लगातार दोस्रोपटक गोल्डेन बुट जित्नुभएको छ । फेरि आफ्नो उत्कृष्टता प्रमाणित गर्दै उहाँले सन् २०२४-२५ को सिजनमा अर्को गोल्डेन बुट जित्नुभएको हो । सन् २०२४-२५ को सिजनमा अल-नासरका कप्तान रोनाल्डो २५ गोल गर्नुभएको छ । योसँगै उहाँ सिजनको सर्वाधिक गोलकर्तासमेत बन्नुभयो ।

४० वर्षीय स्टारले यो सिजन पनि लगातार उत्कृष्ट लय कायम राख्नुभयो । अन्तिम खेलसम्म प्रतिस्पर्धा चलेको गोल्डेन बुटको दौडमा उहाँले अल–अहलीका इंग्लिस स्ट्राइकर इभान टोनीलाई पछि पार्नुभएको हो ।

टोनीले भने पहिलो सिजनमै २३ गोल गर्दै आफूलाई साउदी लिगका सबैभन्दा खतरनाक स्ट्राइकरमध्ये एकका रूपमा स्थापित गर्नुभएको छ । तेस्रो स्थानमा समान २१ गोलसहित अल–इत्तिहादका करिम बेन्जिमा र अल-शबाबका अब्देरराजाक हम्दाल्ला रहनुभयो । बेन्जिमाले चोट र क्लबभित्रका समस्याबीच पनि राम्रो प्रदर्शन कायम राख्नुभयो ।

सिजनका उत्कृष्ट अनुबन्धमध्ये एक मानिएका अल कद्सियाका कोलम्बियन स्ट्राइकर जुलियन किनोनेसले २० गोल गर्दै आफ्नो टोलीको सानदार सिजनमा ठूलो भूमिका खेल्नुभयो । यसैगरी अल हिलालका अलेक्जान्डर मिटरभोभिचले पनि १९ गोल गर्दै टोलीका लागि निर्णायक भूमिका खेल्नुभयो ।