पाकिस्तानका खेलहरू श्रीलंकामा हुने

काठमाडौं । आइसिसी महिला एकदिवसीय विश्वकप क्रिकेट प्रतियोगिता २०२५ आगामी सेप्टेम्बर ३० बाट सुरु हुँदैछ । उद्घाटन खेलमा आयोजक भारतले बेंगलुरुको एम चिन्नास्वामी रंगशालामा श्रीलंकासँग प्रतिस्पर्धा गर्नेछ । यो प्रतियोगिता भारतका बेंगलुरु, इन्दौर, गुवाहाटी, विशाखापट्टनम र श्रीलंकाको कोलम्बो गरी पाँच स्थानमा खेलाइनेछ ।

प्रतियोगिताको आधिकारिक आयोजक भारत हो । तर, भारत र पाकिस्तान क्रिकेट बोर्डबीचको सम्झौताअनुसार पाकिस्तानका खेलहरू श्रीलंकामा हुन लागेका हुन् ।

भारत र पाकिस्तानबीचको राजनीतिक तनावका कारण दुवै टोलीले एकअर्काको मैदानमा खेल्ने गरेका छैनन् । भारतको सबैभन्दा चर्चित खेल पाकिस्तानविरुद्ध अक्टोबर ५ मा श्रीलंकाको कोलम्बोमा हुनेछ । भारतले अक्टोबर २६ मा बेंगलुरुमा बंगलादेशसँग पनि खेल्नेछ ।

साबिक विजेता अस्ट्रेलियाले आफ्नो अभियान अक्टोबर १ मा न्युजिल्याण्डविरुद्ध इन्दौरमा सुरु गर्नेछ । उसले अक्टोबर ८ मा कोलम्बोमा पाकिस्तानसँग र अक्टोबर २२ मा इन्दौरमा इंग्ल्याण्डसँग खेल्नेछ ।

भारतसँगको राजनीतिक तनावका कारण पाकिस्तानले आफ्ना सबै खेलहरू श्रीलंकाको कोलम्बोमा खेल्नेछ । उसको खेल तालिकाअनुसार बंगलादेश (अक्टोबर २), इंग्ल्याण्ड (अक्टोबर १५), न्युजिल्याण्ड (अक्टोबर १८), दक्षिण अफ्रिका (अक्टोबर २१) र श्रीलंका (अक्टोबर २४) विरुद्ध रहेका छन् ।

प्रतियोगितामा सहभागी आठ टोलीले एकअर्कासँग खेलेपछि शीर्ष चार टोली सेमिफाइनलमा पुग्नेछन् । पहिलो सेमिफाइनल अक्टोबर २९ मा र दोस्रो सेमिफाइनल अक्टोबर ३० मा हुनेछ । फाइनल खेल नोभेम्बर २ मा बेंगलुरु वा कोलम्बोमा आयोजना हुनेछ ।(एजेन्सी)