काठमाडौं । इन्टर मियामीका कप्तान लिओनल मेसी फेरि घाइते हुनुभएको छ, आइतबार बिहान मेक्सिकन क्लब नेकाक्साविरुद्धको खेलको सुरुवातमै उहाँ घाइते हुनुभएको हो । खेलको आठौं मिनेटमा दुई डिफेन्डरको बीचमा पेनाल्टी क्षेत्रतिर दौडिरहँदा मेसी लड्नुभएको थियो । त्यसपछि उहाँ बाहिरिनुभएको थियो ।
११औँ मिनेटमा उहाँलाई फेडेरिको रेडोन्डोले प्रतिस्थापन गर्नुभएको थियो । मेसी बाहिरिए पनि मियामीले जित भने निकाल्यो । निर्णायक पेनाल्टीमा लुइस सुवारेजले जाली चुमाउँदा मियामीले ५-४ को जित निकाल्यो ।
मेसीले आफ्नो करिअरभर थुप्रैपटक हृयामस्ट्रिङको चोट भोग्नुभएको छ । पछिल्लो केही सिजनमा पनि उहाँले विभिन्न खुट्टासम्बन्धी चोटका कारण खेल गुमाउनुभएको थियो । हालैको चोट बायाँ एडडक्टरमा थियो । त्यसकारण उहाँले यसै वर्ष अर्जेन्टिनाको विश्वकप छनोटका दुई खेल गुमाउनुभएको थियो । अबको केही दिनमा उहाँको चोटबारे थप परीक्षण हुने अनुमान छ । सामान्यतया यस्ता मांसपेशीसम्बन्धी चोटका लागि एमआरआई स्क्यान गरिन्छ । तर, अहिलेसम्म उहाँको एमआरआई कहिले गरिन्छ भन्ने जानकारी आएको छैन ।
खेलपछि प्रशिक्षक जेभियर मास्चेरानोले मेसीलाई गम्भीर चोट नलागेजस्तो देखिए पनि दायाँ तिघ्रा केही तानिएको महसुस भएको बताउनुभयो । खेलको सुरुवातमै म्याक्सी फाल्कोनलाई रातो कार्ड देखाइएपछि मियामी १० खेलाडीमा समेटिएको थियो । ६०औँ मिनेटमा नेकाख्साका क्रिस्टियन काल्डेरोन दोस्रो पहेँलो कार्ड पाएपछि दुवै टोली १०-१० खेलाडीमै समेटिएका थिए । (एजेन्सी)
