काठमाडौं । सन् २०२७ को एकदिवसीय विश्वकपका ४४ खेलहरू दक्षिण अफ्रिकामा हुने भएका छन् । क्रिकेट दक्षिण अफ्रिका (सिएसए)ले एकदिवसीय विश्वकपका लागि आठवटा स्थानहरू तय गरेको हो । यसअनुसार विश्वकपका ४४ खेलहरू दक्षिण अफ्रिकाका आठ शहरहरूमा खेलाइनेछ, जबकि १० खेलहरू नामिबिया–जिम्बाब्वेमा आयोजना हुनेछन् । दक्षिण अफ्रिकामा आयोजना हुने खेलहरू जोहानेसबर्ग, प्रिटोरिया, केप टाउन, डरबन, ग्केबार्हा, ब्लोमफोन्टेन, पूर्वी लण्डन र पार्लमा खेलाइने अन्तर्राष्ट्रिय सञ्चारमाध्यमहरूले जनाएका छन् ।
समाचारअनुसार प्रतियोगिता आयोजना गर्न सिएसएले स्थानीय समिति पनि गठन गरेको छ । दक्षिण अफ्रिकी पूर्वअर्थमन्त्री ट्रेवर म्यानुअललाई २०२७ क्रिकेट विश्वकपको स्थानीय आयोजक समितिको प्रमुख बनाइएको छ ।
दक्षिण अफ्रिकाले पाँचवटा आइसिसी प्रतियोगिता आयोजना गरिसकेको छ । दक्षिण अफ्रिकाले २००९ मा च्याम्पियन्स ट्रफी, २००७ मा पहिलो टी–२० विश्वकप र २००३ मा एकदिवसीय विश्वकप आयोजना गरेको थियो । यसबाहेक दक्षिण अफ्रिकाले दुई महिला विश्वकप पनि सफलतापूर्वक आयोजना गरिसकेको छ ।
दक्षिण अफ्रिका र जिम्बाब्वे आयोजकका रूपमा प्रतियोगिताका लागि पहिले नै छनोट भइसकेका छन् तर नामिबियाले प्रतियोगितामा छनोट हुन अफ्रिकी छनोट खेलहरू पार गर्नुपर्नेछ । बाँकी टोलीहरूको निर्णय आइसिसी एकदिवसीय वरीयताका आधारमा गरिनेछ । शीर्ष आठ टोलीहरू सिधै छनोट हुनेछन्, जबकि अन्तिम चार देशहरूले विश्वव्यापी छनोट खेलहरू खेल्नुपर्नेछ ।
प्रतियोगितामा १४ टोलीले भाग लिनेछन् । प्रतियोगिता दुई समूहमा खेलाइनेछ, प्रत्येक समूहमा सात टोलीहरू हुनेछन् । समूह चरणमा प्रत्येक टोलीले आफ्नो समूहका अन्य सबै टोलीहरूसँग खेल खेल्नेछ । प्रत्येक समूहका शीर्ष तीन टोलीहरू सुपर सिक्स राउण्डमा पुग्नेछन् । यसपछि शीर्ष टोलीहरूले सेमिफाइनल खेल्नेछन् । अन्त्यमा नयाँ च्याम्पियनको निर्णय फाइनलमार्फत् गरिनेछ ।
पछिल्लो एकदिवसीय विश्वकपको उपाधि अस्ट्रेलियाले जितेको थियो । १९ नोभेम्बर २०२३ मा अहमदाबादमा खेलिएको फाइनल खेलमा कंगारु टोलीले आयोजक भारतलाई ६ विकेटले पराजित गरेको थियो । (एजेन्सी)
