काठमाडाैं । गाजा पट्टीमा इजरायली सेनाको आक्रमणमा कम्तिमा ५० प्यालेस्टिनीहरू मारिएको गाजाको नागरिक रक्षा विभागले जनाएको छ । गाजामा नागरिक रक्षा विभागका प्रवक्ता महमूद बसालले बताएअनुसार दक्षिणी गाजाको खान युनिसका धेरै क्षेत्रहरूमा विस्थापित व्यक्तिहरूलाई बसोबास गर्ने पालहरूलाई लक्षित गरी इजरायली गोलाबारी गर्दा १२ प्यालेस्टिनीहरू मारिएका छन् । बसालले इजरायली विमानले बुरेइज शरणार्थी शिविरको एउटा घरलाई लक्षित गर्दा ६ जनाको मृत्यु भएको बताउनु भयो ।
मध्य गाजाको अल–नुसेरातको पश्चिममा रहेको अल–सावरा क्षेत्रमा रहेको उनीहरूको पाललाई लक्षित गरी गरिएको हवाई आक्रमणमा एक पुरुष र उनकी श्रीमतीको मृत्यु भएको छ । गाजा शहरको दक्षिणमा रहेको अल–सब्रा छिमेकमा रहेको आवासीय घरमा इजरायली हवाई आक्रमणमा सात जनाको मृत्यु भएको छ । बसालकाअनुसार शहरको उत्तरमा रहेको अल–सफ्तावी क्षेत्रमा इजरायली तोपखानाको गोलाबारीबाट सात जनाको मृत्यु भएको छ ।
मध्य गाजाको देइर अल–बलाह शहरमा विस्थापित व्यक्तिहरूलाई बस्ने गोदाममा इजरायली हेलिकप्टरहरूले निशाना बनाउँदा दुई महिलाको मृत्यु भएको छ । अल–जला र अल–जैतुन छिमेकमा रहेको आवासीय अपार्टमेन्ट र प्यालेस्टिनीहरूको भेलामा इजरायली हवाई आक्रमणमा छ जनाको मृत्यु भएको बताउनु भयो । बसलकाअनुसार मध्य र दक्षिणी गाजामा नेत्जारिम र खान युनिस जंक्शनमा सहायता वितरण केन्द्रहरू नजिक आठ जनाको मृत्यु भएको छ ।
यी घटनाहरूमा इजरायली सेनाबाट तत्काल कुनै टिप्पणी आएको छैन । इजरायलले मार्च १८ मा आफ्नो तीव्र सैन्य अभियान पुनः शुरु गरेदेखि, कम्तिमा १० हजार ९७५ प्यालेस्टिनीहरू मारिएका छन् । ४६ हजार ५८८ घाइते भएका छन् । जसले गर्दा अक्टोबर २०२३ मा युद्ध सुरु भएदेखि गाजामा कुल मृत्यु हुनेको संख्या ६२ हजार ८१९ पुगेको छ । जसमा कुल १ लाख ५८ हजार ६२९ जना घाइते भएका छन्, गाजाका स्वास्थ्य अधिकारीहरूले मंगलवार जारी गरेको तथ्याङ्कले देखाएको छ ।(सिन्ह्वा)
