काठमाडौं । स्पेसएक्सको स्टारशिप मेगा रकेट करिब दुई साताभित्रै पुनः उड्ने भएको छ। यदि सबै योजना अनुसार भएमा यो सम्भव हुने देखिएको हो।
स्पेसएक्सले सोमबार (सेप्टेम्बर २९) घोषणा गरेको अनुसार स्टारशिपको ११औं उडान अक्टोबर १३ मा गर्ने लक्ष्य राखिएको छ। यो उडान हालको “भर्सन २” संस्करणको अन्तिम प्रक्षेपण हुनेछ।
प्रक्षेपण स्पेसएक्सको साउथ टेक्सासस्थित स्टारबेस साइटबाट हुनेछ। अक्टोबर १३ को प्रक्षेपण विन्डो स्थानीय समय साँझ ६:१५ बजे (७:१५ ईडीटी; २३:१५ जीएमटी) खुल्ने कम्पनीले सोमबार दिएको अपडेटमा जनाएको छ। प्रक्षेपणको सीधा प्रसारण कम्पनीले प्रस्थानभन्दा ३० मिनेटअघि सुरु गर्नेछ।
मानवलाई मंगल ग्रहमा बसोबास गराउन सहयोग गर्नका लागि स्पेसएक्सले स्टारशिप विकास गरिरहेको हो, जुन कम्पनीका संस्थापक तथा सीईओ ईलन मस्कको लामो समयदेखिको सपना हो। यो रकेट दुईवटा स्टेनलेस–स्टिल कम्पोनेन्टमा बनेको छ — पहिलो चरणको बुस्टर “सुपर हेभी” र माथिल्लो चरण “स्टारशिप” (संक्षेपमा शिप), दुवै पुनः प्रयोगयोग्य बनाउन डिजाइन गरिएका छन्।
स्टारशिप भर्सन २ हालसम्म बनेका सबैभन्दा ठूलो र शक्तिशाली रकेट हो, जुन जोड्दा करिब ४०० फिट (१२१ मिटर) अग्लो हुन्छ। यसपछिको भर्सन ३, जुन फ्लाइट १२ मा पहिलो पटक उड्नेछ, अझ ठूलो हुनेछ — ४०८ फिट (१२४.४ मिटर) अग्लो।
तर, योजना अनुसार अगाडि बढेमा रकेट अझै ठूलो हुँदै जानेछ। सन् २०२७ मा प्रक्षेपण हुने अपेक्षा गरिएको भर्सन ४ को उचाइ करिब ४६६ फिट (१४२ मिटर) हुनेछ।
स्टारशिप फ्लाइट ११, अघिल्लो फ्लाइट १० जस्तै हुनेछ, जसले अगस्ट २६ मा सफलतापूर्वक उडान भरेको थियो।(एजेन्सी)
