काठमाडौं । पछिल्लो समय गाजाको युद्धविरामलाई लिएर अन्तर्राष्ट्रिय जगतमा बिबिध चर्चा आएको छ । सोही सम्बन्धमा, इजरायली प्रधानमन्त्री बेन्जामिन नेतान्याहूले युद्धविरामका लागि सहमति जनाएपछि पनि इजरायलले गाजा वा लेबनानमा आक्रमण गर्न कसैको अनुमति नलिने बताएका छन् । हामी एक स्वतन्त्र राष्ट्र हौ, उनले भनेका छन ।
‘इजरायल एक स्वतन्त्र राष्ट्र हो । हामी आफ्नै सेनाका साथ आफ्नो रक्षा गर्नेछौँ र हामी हाम्रो भाग्यलाई नियन्त्रण गर्न जारी राख्नेछौँ,’ नेतान्याहूले आफ्नो साप्ताहिक सरकारी बैठकको सुरुमा मन्त्रीहरूसँग भने, ‘यसका लागि हामी कसैको स्वीकृति खोज्दैनौँ । हामी हाम्रो सुरक्षालाई मध्यनजर राखेर अघि बढ्छौँ ।’
गाजामा अन्तर्राष्ट्रिय शान्ति सेना तैनाथ गर्ने योजनालाई सङ्केत गर्दै नेतान्याहूले कुन देशले त्यहाँ सेना तैनाथ गर्न सकिन्छ भनेर इजरायलले निर्णय गर्ने बताए । ‘हामीले यो स्पष्ट पारिसकेका छौँ, इजरायलले कुन सेना उसलाई अस्वीकार्य छ भनेर निर्धारण गर्नेछ र तदनुसार कार्य जारी राख्नेछ,’ उनले भने ।
गाजामा युद्धविरामलाई सुदृढ पार्ने उद्देश्यका साथ ह्वाइट हाउसका वरिष्ठ अधिकारीको कूटनीतिक भ्रमणको एक हप्तापछि उनको टिप्पणी आएको हो ।(एजेन्सी)
