काठमाडौँ । संयुक्त राष्ट्रसङ्घीय महासभाले प्यालेस्टाइन शरणार्थीका लागि संयुक्त राष्ट्रसङ्घीय राहत तथा कार्य एजेन्सी (युएनआरडब्लुए) को जनादेश नवीकरण सहित प्यालेस्टाइनको पक्षका प्रस्तावहरूलाई भारी बहुमतले पारित गरेको छ।

युएनआरडब्लुएको सञ्चालन र तीन वर्षका लागि नवीकरण गर्ने दोस्रो महत्त्वपूर्ण प्रस्तावलाई १४५ देशहरूले समर्थन गरेका थिए, भने १० वटा विरुद्धमा र १८ वटा अनुपस्थित रहे। महासभामा प्यालेस्टिनी शरणार्थीहरूलाई सहयोग गर्ने सम्बन्धमा पहिलो प्रस्तावलाई १५१ देशहरूले समर्थन गरेका थिए।

प्यालेस्टिनी शरणार्थीहरूको सम्पत्ति र यसबाट प्राप्त राजस्व सम्बन्धी तेस्रो प्रस्तावलाई १५७ देशहरूले समर्थन जनाएका थिए। त्यसैगरी, पूर्वी जेरुसेलम र कब्जा गरिएको सिरियाली गोलानसहित कब्जा गरिएको प्यालेस्टिनी क्षेत्रमा इजरायली बस्तीहरू सम्बन्धी, पाँचौँ प्रस्ताव १४६ मत सहित पारित भएको थियो। प्यालेस्टिनी जनता र कब्जा गरिएका क्षेत्रहरूमा मानव अधिकारलाई असर गर्ने इजरायली अभ्यासको अनुसन्धान गर्ने विशेष समितिको कामको सम्बन्धमा रहेको चौथो प्रस्तावलाई भने ८८ देशहरूले समर्थन गरेका थिए।

युएनआरडब्लुएका आयुक्त–जनरल फिलिप लाजारिनीले युएनआरडब्लुएको जनादेशलाई तीन वर्षका लागि नवीकरण गर्न संयुक्त राष्ट्र महासभाले गरेको भारी मतदानलाई स्वागत गर्दै प्रस्तावले प्यालेस्टाइन शरणार्थीहरूसँग विश्वव्यापी ऐक्यबद्धता उजागर गर्ने जनाए। संयुक्त राष्ट्रका अधिकारीहरूले विज्ञप्ति जारी गर्दै प्रस्तावले प्यालेस्टाइन शरणार्थीहरूको मानवीय र मानव विकासको आवश्यकतालाई समर्थन गर्ने अन्तर्राष्ट्रिय समुदायको जिम्मेवारीको स्वीकृतिलाई प्रतिनिधित्व गर्ने जनाएका छन्। (एजेन्सी)