काठमाडौं । नामिबियाका ब्याटर जान निकोल लोफ्टी इटोनका लागि सोमबार कीर्तिपुर विशेष स्थान बन्यो । सम्भवतः कीर्तिपुरको त्रिवि क्रिकेट मैदान लोफ्टीको करियरमा कहिल्यै भुल्न नसकिने स्थान रहिरहने छ ।
त्रिदेशीय शृङ्खलाको पहिलो खेलमा घरेलु टिमलाई १५ हजारभन्दा धेरै समर्थकमाझ २० रनले निराश बनाउँदा लोफ्टीको कीर्तिमानी प्रदर्शन केन्द्रमा थियो ।
टस जितेर ब्याटिङमा आएको नामिबियाबाट लोफ्टीले ३३ बलमै १०० रनको विस्फोटक इनिङ खेले । ट्वान्टी–२० अन्तर्राष्ट्रिय क्रिकेटमा योभन्दा छिटो विश्वका कुनै पनि ब्याटरले शतक बनाएका छैनन् । सोमबारको खेलबाट लोफ्टी क्रिकेटको सबैभन्दा सानो संरचनामा सबैभन्दा छिटो शतक बनाउने खेलाडी बने ।
नामिबियाको डकआउटमा कीर्तिमानको खुसियाली छाइरहँदा लोफ्टीका लागि भने यो अझ विशेष रह्यो । विशेष यसकारण, उनले यसअघि नेपाली ब्याटरकै नाममा रहेको कीर्तिमान नेपाल आएर घरेलु टिमविरुद्ध खेल्दा नै तोडे ।
“यो अनुभव विशेष छ । मेरा लागि आज यो दिन विशेष रह्यो । शतकपछि वास्तवमा म रुन चाहन्थेँ,” लोफ्टीले कीर्तिमानी शतकपछिको भावना यसरी सुनाए ।
नामिबियाका अलराउन्डर लोफ्टीले सन् २०२१ मा युगान्डाविरुद्ध खेल्दै देशबाट अन्तर्राष्ट्रिय ट्वान्टी–२० क्रिकेटमा ‘डेब्यू’ गरेका थिए । आजको खेल अघिसम्म नामिबियाबाट लोफ्टीको प्रदर्शन औसतभन्दा माथि जान सकेको थिएन ।
यसअघि ३२ अन्तर्राष्ट्रिय ट्वान्टी–२० खेल खेल्दा उनले एउटा पनि अर्धशतक पनि प्रहार गर्न सकेका थिएनन् । एक दिवसीयमा ६ अर्धशतक बनाएका लोफ्टीको यो करियरकै पहिलो अन्तर्राष्ट्रिय शतकसमेत हो ।
“नामिबियाका लागि यो मेरो पहिलो शतक हो । मैले यो टिमसँग लामो समयदेखि ऋणी भएको महसुस गरिरहेको थिएँ र अहिले यो समय आएको छ । शतकको अन्तिम रन बन्दा म भावनात्मक र खुसी थिएँ,” लोफ्टीले भने ।
लोफ्टी ब्याटिङका लागि नआउँदासम्म नामिबियाले १०.४ ओभरमा तीन विकेट गुमाएर ६२ रनमात्र जोडेको थियो । तर, यसपछि लोफ्टीले चौथो विकेटका लागि मलान क्रुजरसँग ५२ बलमा १३५ रनको अर्को कीर्तिमानी साझेदारी गर्दै नामिबियालाई बलियो स्थितीमा पुर्याएका थिए । १९.२ ओभरमा लोफ्टीलाई अभिनाष बोहराले गुल्सन झामार्फत क्याच गराउनुअघि नामिबिया १९७ रनको बलियो स्थितिमा पुगिसकेको थियो ।
लोफ्टीले र मलानको यो साझेदारी ट्वान्टी–२० अन्तर्राष्ट्रिय क्रिकेटमा नामिबियाले बनाएको अहिलेसम्मकै ठूलो साझेदारी हो । यो जोडीले यसअघि सन् २०१९ मा सीजी विलियम्स र जेपी कोट्जेले बोत्सवानाविरुद्ध ११२ रनको साझेदारीको कीर्तिमान तोडे ।
सबैभन्दा छिटो शतक बनाउने क्रममा लोफ्टीले ३३ बलमा ११ चौका र आठ छक्का प्रहार गरे । ३० बलमा ९० बनाउँदा कुशलको कीर्तिमान तोड्न उनलाई तीन बलमा १० रन आवश्यक थियो । लोफ्टीले ३१औँ बलमा दीपेन्द्रसिंह ऐरीको ओभरमा छक्का प्रहार गरे । ३२औँ बल डट खेलेका लोफ्टीले ३३औँ बलमा चौका प्रहार गर्दै कीर्तिमान आफ्नो नाममा लेखाएका थिए ।
रोचक संयोग त के भने, ट्वान्टी–२० अन्तर्राष्ट्रिय क्रिकेटमा लोफ्टीले खेलेको ३३औँ खेल ३३ बलमा नै शतक बनाए ।
खेलपछि पत्रकारसँगको कुराकानीमा भने उनले ट्वान्टी–२० अन्तर्राष्ट्रिय क्रिकेटमा सबैभन्दा छिटो शतक बनाउने खेलाडी बनेकोबारे कसैले भनेपछि मात्रै आफूलाई थाहा भएको बताए ।
“मलाई योबारे थाहा थिएन । मलाई कुशल मल्लले २९ बलमा सबैभन्दा छिटो शतक बनाउने कीर्तिमान राखेका छन् जस्तो लागेको थियो,” उनले भने, “कोही एकजना आए र मलाई यो ट्वान्टी–२० अन्तर्राष्ट्रिय क्रिकेटकै सबैभन्दा छिटो बनेको शतक हो भने । तर, मलाई विश्वास थिएन । अहिले यहाँ पनि सुनेँ ।”
शतकपछि नेपाली क्रिकेटप्रेमी समर्थकबाट लोफ्टीले ‘स्ट्यान्डिङ ओभेसन’ पाए । नेपाली टिमका कप्तान रोहितकुमार पौडेलले पनि लोफ्टीको कीर्तिमानी प्रदर्शनको तारिफ गर्न कन्जुस्याइँ गरेनन् ।
“लोफ्टीले एकदम राम्रो ब्याटिङ गर्यो । उसले खेल्न खोजेको सबै सट सफल भइरहेको थियो,” रोहितले भने, “क्रेडिट लोफ्टीलाई पनि दिनुपर्छ । उसले पनि मेहनत गरेको होला । उसले एकदम राम्रो खेल्यो ।”
