काठमाडौं ।
नेपाल खेलकुद महासंघले महाधिवेशनको पूर्वसन्ध्यामा ‘केपी ओली रोड रेस’ प्रतियोगिताको आयोजना गर्ने भएको छ । खेलकुद महासंघले महाधिवेशनको सन्दर्भ पारेर पहिलो संस्करण अन्तर्गत ‘केपी ओली रोड रेस’ प्रतियोगिता गर्न लागेको हो ।
फागुन ७ गते विहान हुने ‘केपी ओली रोड रेस’ प्रतियोगितामा हजारौँको सहभागिता रहने खेलकुद महासंघका संयोजक पर्शुराम बस्नेतले बताउनुभयो ।
विराटनगरको शहिद रंगशालामा शुरु हुने रोड रेस प्रतियोगितामा प्रथम हुने महिला र पुरुषलाई जनही १ लाख १ हजार नगद पुरस्कारको व्यवस्था गरिएको महासंघका प्रवक्ता तीर्थ बहादुर खड्काले बताउनुभयो ।
त्यस्तै रोड रेसमा दोस्रो स्थान हासिल गर्नेलाई ५१ हजार र तेस्रो हुनेलाई २५ हजार नगद पुरस्कारको व्यवस्था गरेको उहाँले बताउनुभयो । महाधिवेशनको पुर्वसन्ध्यामा महासंघले ‘पुष्पलाल स्मृति ब्याडमिन्टन’ प्रतियोगिता लगायत अरु विभिन्न खेल खेलाउने तयारी गरेको खेलकुद महासंघका प्रवक्त्ता खड्काले जनाउनु भएको छ ।
महासंघले यस वर्षबाट शुरु गर्ने केपी ओली रोड रेस प्रतियोगितालाई हरेक वर्ष निरन्तरता दिने जनाएको छ ।
नेपाल खेलकुद महासंघको यही फागुन ७ देखि ९ गतेसम्म विराटनगरमा दोस्रो राष्ट्रिय महाधिवेशन हुँदैछ । महाधिवेशनको एमाले अध्यक्ष केपी शर्मा ओलीले उद्घाटन गर्नुहुनेछ।
